Орхон аймагт шилжин ирж суурьшсан багш нарт хүндэтгэл үзүүллээ
Дэлхийн багш нарын 31, Монголын багш нарын 59 дэх өдрийг тохиолдуулан Орхон аймаг, Эрдэнэт хотод ажиллаж, амьдархаар шилжин ирж суурьшсан багш нарыг аймгийн Засаг дарга Б.Зоригтбаяр хүлээн авч уулзан, хүндэтгэл үзүүллээ. Мөн энэ үеэр орон нутгаас боловсролын салбарт хийж буй хөрөнгө оруулалт, цаашдын зорилго зорилт, бодлогын талаар мэдээлэл өгөв.
2024-2025 онд манай аймагт Улаанбаатар, Архангай, Хөвсгөл, Завхан зэрэг аймгуудаас 50 багш шилжин иржээ. Үүний 15 нь ажил амьдралын гараагаа Орхон аймгаас эхэлж буй шинэ төгсөгч байна.
Монгол Улсын урт хугацааны хөгжлийн бодлого “Алсын хараа -2050”, “Шинэ сэргэлтийн бодлого”, Хот хөдөөгийн сэргэлтийг эрчимжүүлэх, хэрэгжилтийг орон нутагтаа хангах зорилгоор 2023 оноос “Хамтдаа Эрдэнэтэд хөгжье” хөтөлбөрийг хэрэгжүүлж буй. Хөтөлбөрийн хүрээнд олон талт арга хэмжээг хэрэгжүүлсний үр дүнд сүүлийн 3 жилд Орхон аймагт 350 гаруй багш шилжин ирж, аймгийн хэмжээнд дутагдалтай байсан багшлах боловсон хүчний асуудлыг шийдвэрлэхэд томоохон түлхэц болж байна.
Аймгийн Засаг дарга Б.Зоригтбаяр "Засаг даргын 2024-2028 оны үйл ажиллагааны хөтөлбөрт боловсролын салбарыг хөгжүүлэх ирэх 4 жилийн зорилтыг "Боловсролын үйлчилгээний чанар, хүртээмжийг нэмэгдүүлж, багш хүүхдийн хөгжлийг хангах" гэж тодорхойлсон. Энэ зорилтын хүрээнд аймгийн ИТХ-ын хуралдаанаар "Хүн амын бүлгүүд, нийгмийн салбарын хүний нөөцийн хөгжлийн хөтөлбөр"-ийг батлуулж багшлах боловсон хүчнээ чадавхжуулах төрөл бүрийн сургалт, үйл ажиллагааг зохион байгуулж эхлээд байна" гэв.
Орхон аймаг багш нарынхаа хөгжилд анхаарсан төсөл хөтөлбөр хэрэгжүүлдгээрээ, боловсролын салбарт хийж буй хөрөнгө оруулалтын хэмжээгээрээ бусад аймаг орон нутгаа ямагт түүчээлдэг билээ. Багш нарын ажиллах орчих нөхцөл, хүүхэд багачуудын сурч хүмүүжих орчин нөхцөлийг сайжруулахад онцгой анхаарч ирсэн. Тухайлбал, 2021 онд 1,1 тэрбум, 2022 онд 1,2 тэрбум, 2023 онд 2,6 тэрбум 2024 онд 3,6 тэрбум төгрөгийг орон нутгийн төсвөөс зарцуулж байсан бол 2025 онд 20,9 тэрбум төгрөгийг сургууль, цэцэрлэгийн засвар үйлчилгээнд зарцуулаад байна.
Мэдээллийн төв
