Төрийн албаны III улирлын ерөнхий шалгалтын бүртгэл эхэллээ
Төрийн албаны 2025 оны гуравдугаар улирлын ерөнхий шалгалтын бүртгэл өнөөдөр эхэллээ. Бүртгэлийг ирэх сарын 4-ний 09:00 цаг хүртэл Төрийн албаны зөвлөлийн цахим хуудсаар хүлээн авч байна. https://exam.csc.gov.mn/ Шалгалтыг есдүгээр сарын 17-24-ны өдрүүдэд улсын хэмжээнд зохион байгуулах юм.
Орхон аймагт 2025 оны 1, 2 дугаар улирлын төрийн албаны ерөнхий шалгалт өгөхөөр 162 иргэн бүртгүүлж, 113 иргэн буюу 69.7 хувь нь шалгалтад оржээ. Шалгуулагчдын 47.7 хувь буюу 54 иргэн төрийн албаны ерөнхий шалгалтад тэнцэж, төрийн жинхэнэ албаны нөөцөд бүртгэгдсэн байна.
2025 оны эхний хагас жилд төрийн албаны удирдах болон гүйцэтгэх албан тушаалын тусгай шалгалт зохион байгуулах хүсэлтэй 21 байгууллагын 30 сул албан тушаалын захиалгыг хүлээн авч, холбогдох хууль, эрх зүйд нийцэж байгаад үнэлгээ хийн, төрийн өөр байгууллага, нэгж хооронд шилжин ажиллах зарыг 11 удаа нийтэд мэдээлснээс төрийн холбогдох бусад байгууллагад ажиллаж байгаа 5 төрийн жинхэнэ албан хаагчдыг шилжүүлэн томилжээ.
Шилжүүлэх зараар нөхөгдөөгүй 25 сул орон тооны захиалгыг Төрийн албаны зөвлөлд 7 удаа хүргүүлсэн бөгөөд дэс түшмэлийн 26 албан тушаалд 3, ахлах түшмэлийн 2 албан тушаалд-1 удаа, төрийн үйлчилгээний төсвийн шууд захирагч 2 албан тушаалд 1 удаа нийт 5 удаа Салбар зөвлөлийн тогтоолоор байгуулагдсан комисс тусгай шалгалтыг зохион байгуулахад 2 төрийн жинхэнэ албан хаагч болон 14 төрийн жинхэнэ албаны нөөцөд бүртгэлтэй иргэд тэнцсэн байна.
Төрийн албаны салбар зөвлөлөөс тэнцсэн 16 оролцогчыг нэр дэвшүүлэн тухайн байгууллагуудад томилсон. Ерөнхий шалгалт зохион байгуулах бэлтгэл ажлын хүрээнд ерөнхий шалгалтад бүртгүүлсэн иргэдэд “Бат гэгээн эрдэм” ТББ -тай хамтран арга зүйн сургалтыг зохион байгуулна.
Түүнчлэн Төрийн албаны зөвлөлөөс төрийн албаны ерөнхий шалгалтад оролцогчдод зориулсан 2024 оны “Төрийн албаны ерөнхий шалгалтын сорил, даалгавар” цахим ном, “E-taz” гар утасны аппликейшныг шинэчлэн гаргасан. Цаашид төрийн албанд ажиллах хүсэлтэй нийт иргэдийг төрийн албаны ерөнхий шалгалтын бүртгэлээ баталгаажуулж амжилттай оролцохыг урьж байна.
Мэдээллийн төв
