378 ээж “Алдарт эх”-ийн I,II зэргийн одон хүртлээ

Энэ жил Монгол Улсын Ерөнхийлөгчийн зарлигаар Орхон аймаг, Эрдэнэт хотын 378 ээж “Алдарт эх”-ийн I,II зэргийн одон хүртсэнээс I зэргийн одонгоор 65, II зэргийн одонгоор 313 эх шагнууллаа. Тэдний хамгийн ахмад нь 77 настай буурай, хамгийн залуу 24 настай ээж байв.

Мөн Монгол Улсын Ерөнхийлөгчийн 2025 оны 02 дугаар сарын 06-ны өдрийн 13 дугаар зарлигаар батлагдсан шинэчлэгдсэн журмаар 100 гаруй ээж олон жилийн дараа “Алдарт эх”-ийн одонгоо хүртэж, хүсэл нь биелэлээ.

“Алдарт эх”-ийн одонг УИХ-ын гишүүн Д.Батлут, аймгийн ИТХ-ын дарга Д.Мөнхбат, Засаг дарга Б.Зоригтбаяр нар гардууллаа. Аймгийн Засаг дарга Б.Зоригтбаяр “Үр хүүхдийнхээ энэрэл хайрын бурхад болсон ижий та нартаа болон та бүхний гэр бүлд аймгийнхаа нийт иргэдийн нэрийн өмнөөс болон хувиасаа халуун баяр хүргэж, ажлын амжилт, эрүүл энх, сайн сайхан байхын өлзийтэй ерөөлийг өргөн дэвшүүлье” хэмээн мэндчилгээ дэвшүүлсэн юм.

Мөн тэрээр, “Алдарт эх” -ийн одон бол ээжүүдийн дундаршгүй хайр,үр хүүхдийнхээ сайн сайхны төлөө зориулсан сэтгэл зүтгэлийн илэрхийлэл юм хэмээв. Хүндэтгэлийн үйл ажиллагааг нээн урлагийн төрөлжсөн сургалттай “Уран эгшиг” сургуулийн морин хуурын чуулга “Сэрсэн тал” аялгууг эгшиглүүлж, Монгол Улсын Ардын жүчигчин С.Ганзориг, МУГЖ Д.Энхзул, МУГЖ Ч.Бат-Эрдэнэ, МУСТА Д.Дагвадорж нар ая дууны мэнд дэвшүүлсэн юм.

Аймгийн хэмжээнд нийт 30.3 мянга өрх, 106.4 хүн ам оршин суурьшиж байгаа нь өмнөх оноос хүн амын тоо 1.1 мянгаар өсжээ. Нийт хүн амын 54.2 мянга нь эмэгтэйчүүд эзэлж байгаа бол тайлант онд 1809 хүүхэд мэндэлсний 913 хүү, 896 охин байна. “Алдарт эх”-ийн одонт 6804 эх байгаагаас I зэргийн одонтой 1444, II зэргийн одонт 5360 ээжүүд байна.

Мэдээллийн төв