Хойд бүсийн зөвлөлийн анхдугаар хуралдаан өнөөдөр Булган аймагт боллоо. Анхдугаар хуралдаанаар аймаг орон нутагт  төдийгүй бүсийн хэмжээнд нэн чухал шаардлагатай хэд хэдэн асуудлыг дэвшүүлж, Хойд бүсийн зөвлөлийн гишүүд дэмжсэнээр ирэх лхагва гарагт  Засгийн газрын хуралдаанаар хэлэлцүүлэхээр боллоо. 

Тухайлбал, Орхон аймаг ирэх жилүүдэд “Эрдэнэт” бонд гаргаж бүтээн байгуулалтаа урагшлуулах түүхэн шийдвэр Хойд бүсийн анхдугаар зөвлөгөөнөөр дэмжигдэв.  Мөн Орхон аймагт Бүсийн хэмжээнд иргэдэд үйлчлэх Хавдрын төв байгуулах санал дэмжигдэж Ерөнхий сайд Л.Оюун-Эрдэнэ “Эрдэнэт медикал” эмнэлгийн менежментийг хувьд шилжүүлэн, Бүсийн хавдрын оношилгоо, эмчилгээний төв болгох үүрэг даалгаврыг холбогдох албаныханд өгөв. Уг төвийг зүрх, судасны төвтэй хамтатган байгуулах орон нутгийн удирдлагуудын санал дэмжигдсэн. 

Тодруулбал, “Эрдэнэт үйлдвэр” ТӨҮГ-ын харьяанд байдаг төрийн өмчит “Эрдэнэт медикал”  эмнэлгийг ЭМЯ-ны харьяа ХСҮТ-ийн салбар эмнэлэг болгоно. Ингэснээр уг эмнэлэг хойд бүсийн хэмжээнд хавдар, зүрх, судасны тусламж үйлчилгээг хариуцах төв болох юм. 

Түүнчлэн "Эрдэнэт үйлдвэр" төрийн өмчит үйлдвэрийн газрыг түшиглэсэн үйлдвэрлэл, технологийн паркийн хүрээнд "Эрдэнэт машин цогцолбор" үйлдвэр байгуулах,  "Эрдэнэт шинжлэх ухаан технологийн парк"-ийн үйл ажиллагааг хойд бүсийн хэмжээнд болгон өргөтгөх, цаашид гарааны бизнесийн төслийг дэмжих эрх зүйн орчныг боловсронгуй болгох зэрэг 10 гаруй санал дэмжигдэж, Засгийн газрын хуралдаанаар хэлэлцэхээр болов. 

Хойд бүсийн хөгжил-2040, Бүсийн хөрөнгө оруулалт, хөгжлийн төсөл хөтөлбөрүүд, Бүсийн зөвлөл, эрхзүйн орчин,  Бүсийн онцлог харьцуулалт, Амьдралын чанар, тулгамдсан асуудлууд зэрэг  салбар хэлэлцүүлгээр дээрх асуудлуудыг хэлэлцсэн. 

Тухайлбал, “Хойд бүсийн хөгжил-2040” хэлэлцүүлгээр  дунд хугацааны бодлогын баримт бичгийн төсөлд олон нийтийн санал авах, бүсийн онцлог давуу тал, нөөц боломж, эдийн засгийн тэргүүлэх чиглэл, чиг үүрэг, оролцооны талаар хэлэлцэв. Тус хэлэлцүүлэгт  аймгийн Засаг дарга Б.Зоригтбаяр панелистаар оролцож Орхон аймаг үнэт цаас гарган  бүсийн хэмжээний төсөл хөтөлбөр хэрэгжүүлэхээр төлөвлөж буй талаараа  мэдээлэл өгсөн.  Мөн Хойд бүсийн Тээвэр ложистикийн төв байгуулах хэрэгцээ шаардлага, түүнийг байгуулснаар бүсийн хэмжээнд худалдааны эргэлт сайжирч, эдийн засгийн чадамж нэмэгдэх талаар,  хойд бүсийн гурван аймагт бие биенээ дэмжсэн үйлдвэр, үйлчилгээний байгууллагуудыг байгуулах нь зүйтэй гэж буй талаараа хуваалцав. 

Хоёр дахь салбар хэлэлцүүлэг “Бүсийн хөрөнгө оруулалт, хөгжлийн төсөл хөтөлбөрүүд” хэлэлцүүлгээр бүс нутагт бизнес эрхлэх таатай нөхцөлийг бүрдүүлэх, хөрөнгө оруулалтыг татах,  баялаг бүтээгчдийг дэмжих, бүсэд ялгаатай татварын бодлого, хэрэгжүүлэх, боломжуудын талаар хэлэлцлээ. Тус хэлэлцүүлэгт аймгийн ЗДТГ-ын Гадаад, хамтын ажиллагаа, төсөл хөтөлбөр хариуцсан удирдагч Б.Оюун-Эрдэнэ панелистаар оролцож, Орхон аймгийн бүсийн хэмжээнд хэрэгжүүлэхээр зорьж буй бодлого төлөвлөлтийн талаар мэдээлэл өгсөн юм.  

Мөн энэ үеэр Эрдэнэт хотын Захирагчийн орлогч Б.Мөнхдалай бүсийн нийгэм эдийн засгийн хөгжлийг дэмжих, төр хувийн хэвшлийн хамтын ажиллагааны хүрээнд хэрэгжүүлэх болон хэрэгжиж буй 11 төсөл хөтөлбөрийн талаар танилцуулга хийсэн. 
Манай аймгийн хувьд:  ”Эрдэнэт үйлдвэрлэл технологийн парк” төсөл,  ”Дахин төлөвлөлт”-ийн төслүүд, ”Эрдэнэт 100 сая хөтөлбөр” төсөл,  ”Хог ангилан ялгах үйлдвэр” , 
 ”Материалын технологийн үйлдвэрлэлийг хөгжүүлсэн туршлага”,  ”Их залуу дэд төв” ,  ”Хойд бүсийн зүрх судасны төв байгуулах” ,  Номин сүлжээ дэлгүүрт бараа бүтээгдэхүүнээ нийлүүлэх боломж давуу тал,  Дани Монголын хамтарсан хариуцлагатай тогтвортой хоршоо,  Арга билиг арвин сүрэг хоршооны танилцуулга, Дундын хоршооны танилцуулга зэрэг төслийг танилцуулав. 

Засгийн газраас 2024 оныг “Бүсчилсэн хөгжлийн жил” болгон зарлаж, УИХ-аар “Монгол Улсын бүсчилсэн хөгжлийн үзэл баримтлал”-ыг батлуулсан.  Ингэснээр 2001 оноос яригдсан бүсчилсэн хөгжлийн бодлого бодитоор ажил хэрэг болох эхлэл нь тавигдаад буй.  Төрийн бодлого тогтвортой үргэлжлэх зарчмыг үндэслэн хамтарсан Засгийн газрын үйл ажиллагааны хөтөлбөрт тусган хэрэгжүүлж, бүсийн зөвлөлүүд анхдугаар хуралдаанаа хийж байгаагийн хоёр дахь нь Хойд бүс юм.

Хойд бүс буюу Орхон, Булган, Хөвсгөл аймгийг  ОХУ болон Европын орнуудтай эдийн засгийн харилцааг өргөжүүлж, Хөвсгөл нуур, Сэлэнгэ мөрний сав газрын эко систем, байгаль, түүх, соёлын өвд тулгуурлан Байгалийн аялал жуулчлалын төрөлжсөн, аж үйлдвэрийн дэд бүс болгон хөгжүүлэхээр тусгасан.  Хойд  бүсийн зөвлөлийн анхдугаар хуралдаанд Хойд бүсээс сонгогдсон Улсын Их хурлын гишүүд, Засгийн газрын гишүүд, бүсийн аймаг, сумын засаг дарга, ИТХ-ын төлөөлөгчид, эрдэмтэд, төр, хувийн хэвшлийн төлөөлөл болсон 900 гаруй төлөөлөгчид оролцлоо. 

Мэдээллийн төв