Орхон аймаг уул уурхайн компаниудтай орон нутгийн тогтвортой хөгжлийг дэмжих, ажлын байр нэмэгдүүлэх, боловсрол эрүүл мэндийн салбарт хөрөнгө оруулалт хийх,  иргэдийн амьжиргааг дээшлүүлэх зорилгоор нийгмийн хариуцлагын хүрээнд хамтын ажиллагааны гэрээг жил бүр байгуулдаг билээ.  ЗДТГ-ын Хамтын ажиллагаа гадаад, дотоодын, төсөл хөтөлбөр хариуцсан удирдагч Б.Оюун-Эрдэнээр ахлуулсан ажлын хэсэг /2025.01.14/ хуралдаж, уул уурхайн компаниудтай байгуулсан 2024 оны  хамтын ажиллагааны  төлөвлөгөөний биелэлтийг дүгнэж, 2025 онд хамтран ажиллах төлөвлөгөөний төслийн талаар хэлэлцлээ. 

    “Ачит-Ихт” ХХК нь 2017 оноос хойш орон нутгийн захиргааны байгууллагатай хамтын ажиллагааны гэрээ байгуулж, эрүүл мэнд, боловсрол гээд нийгмийн бүхий л салбарт  хамтран ажиллаж  ирсэн. 2024 онд 10 арга хэмжээг 160 сая төгрөгийн санхүүжилтээр хэрэгжүүлж, төлөвлөгөөний биелэлтийг 100 хувиар дүгнэв. 
Тухайлбал, 2024 онд “Тэрбум мод” үндэсний хөдөлгөөн, “Ногоон Эрдэнэт” хөтөлбөрийн хүрээнд 312, 235 модыг тарьж, аймгийн ХХҮГ-т бүртгэлтэй 111 иргэнийг мод үрслэгээний чиглэлээр түр ажлын байраар хангасан байна. 

Мөн 85 сая төгрөгийн санхүүжилтээр ерөнхий боловсролын 5-р сургуульд  иж бүрэн тохижуулсан химийн кабинетыг тохижуулж  өнгөрсөн есдүгээр сард  хүлээлгэн өгсөн.  Тус кабинетэд 6–12 дугаар ангийн 36 бүлгийн 1436 сурагч  хичээллэж байна. Хамтын ажиллагааны хүрээнд жил бүр уламжлал болгон зохион байгуулдаг нэг арга хэмжээ нь 9 дүгээр ангийн сурагчдын дунд химийн хичээлээр зохион байгуулдаг тус компанийн нэрэмжит “Анги нийтийн чанарын сорилго” олимпиад юм.  Уг олимпиадад 20 сургуулийн 63 бүлгийн 2048 сурагч оролцжээ. 

Түүнчлэн  өнгөрсөн онд орон нутагт үйл ажиллагаа эрхэлж буй бизнес эрхлэгчдийг дэмжиж  1,7  тэрбум төгрөгийн худалдан авалт хийж бодит дэмжлэгийг үзүүлсэн байна. Тодруулбал, орон нутгийн 75 аж ахуйн нэгж, 55 иргэн,  хоёр  хөгжлийн бэрхшээлтэй иргэнийг дэмжиж  бараа, бүтээгдэхүүнийг нь худалдан авчээ. 2025 оны төлөвлөгөөний төсөлд 10 арга хэмжээг 155 сая төгрөгийн хөрөнгө оруулалтаар хэрэгжүүлэхээр тусгав. 

    “Эрдмин” ХХК өнгөрсөн онд байгаль орчин, боловсрол, эрүүл мэнд, нийгмийн хамгаалал болон бусад чиглэлээр 13 арга хэмжээг 87,6 сая төгрөгөөр  хамтран хэрэгжүүлсэн. Ажлын хэсгийн хурлаар хамтын ажиллагааны төлөвлөгөөний биелэлтийг 100 хувиар дүгнэв. 2024 онд “Эрдмин” ХХК-ийн хийсэн онцлох ажлуудаас дурдвал аймгийн БОЭТ-ийн эх барих, эмэгтэйчүүдийн тасагт 58,7 сая төгрөгийн үнэ бүхий нярайн дулаацуулах ширээ, амьсгалын тоног төхөөрөмжийг нийлүүлсэн.

Мөн урлагийн төрөлжсөн сургалттай “Уран эгшиг” 13-р сургууль, 27-р цэцэрлэгт шаардлагатай тоног төхөөрөмж техник хэрэгслийг хүлээлгэн өгсөн. Нийгмийн хариуцлагын хүрээнд Баянцагаан багийн зорилтот бүлгийн сургуулийн насны хүүхдүүдэд иж бүрэн хичээлийн хэрэгсэл, “Эх Үрсийн баяр”-аар 100 хүүхдэд 10 сая төгрөгийн гарын бэлэг олгожээ. Тус компани орон нутагт үйл ажиллагаа явуулж буй компани, хувь хүмүүсийн бизнесийг дэмжиж нийт 1 тэрбум 300 сая төгрөгийн бараа үйлчилгээний худалдан авалт хийж, бодит дэмжлэгийг үзүүлсэн байна. 2025 оны хамтын ажиллагааны төлөвлөгөөний биелэлтэд 10 арга хэмжээг 100 сая төгрөгөөр хэрэгжүүлэхээр тусгасан.

     2024     онд Орхон аймаг, “Зэс Эрдэнийн хувь” ХХК-тай хамтын ажиллагааны гэрээг анх удаа байгуулснаараа онцлог байв.   Тус компани нь  “Тэрбум мод” үндэсний хөдөлгөөн, “Ногоон Эрдэнэт” хөтөлбөрийн хүрээнд 13 иргэнийг түр ажлын байраар ханган цалингийн зардалд  122,1 сая төгрөгийг зарцуулжээ. Үүнээс таван иргэн байнгын ажлын байраар хангагдаж  тус компанийн үндсэн ажилтан болсон байна. 

Мөн  ерөнхий боловсролын  7-р сургуулийн “Химийн хичээлийн лабораторийн интерьерийн ажлын зураг” бэлэн болж, худалдан авах ажиллагаа болон гүйцэтгэх компанийг сонгон шалгаруулах ажил үргэлжилж байна гэх мэдээллийг өгөв.  “Физикийн судлагдахууны хичээлээр зохион байгуулсан  “Анги нийтийн чанарын уралдаан”-нд  ерөнхий боловсролын 19 сургуулийн 8, 11 дүгээр ангийн 110 бүлгийн 3242 сурагч хамрагдаж, мэдлэг ур чадвараа сорьжээ. 

Мөн “Эрдэнэт” хаалгыг орой 18 цагаас өглөө 08 цаг хүртэл нарны эрчим хүч болон цахилгаан хосолсон хэлбэрээр гэрэлтүүлэх ажлыг гүйцэтгэсэн.  “Зэс эрдэнийн хувь” ХХК  орон нутгийн бизнес эрхлэгч иргэдээс нийт 1.4 тэрбум төгрөгийн бараа,бүтээгдэхүүн  худалдан авсан байна. 

2024 оны хамтын ажиллагааны төлөвлөгөөний биелэлтийг 98.8 хувиар дүгнэлээ. 2025 онд тус компанитай хамтран ажиллах төлөвлөгөөний төсөлд 100 сая төгрөгийн санхүүжилтээр 9 ажлыг хамтран хэрэгжүүлэхээр тусгасан. 

Мэдээллийн төв