Өнөөдөр Орхон аймаг, Эрдэнэт хотын түүхэн баярын  өдөр тохиож байна. Түүх сөхвөл, 1975 оны арванхоёрдугаар сарын 11-нд Ардын Их Хурлын Тэргүүлэгчдийн зарлигаар Булган аймгийн Эрдэнэт хороог улсын зэрэглэлтэй  хот болгохоор шийдвэрлэсэн. 

Хожим  2017 онд  аймгийн ИТХ-ын Тэргүүлэгчдийн хурлаар  жил бүрийн арванхоёрдугаар сарын 11-нийг “Эрдэнэт хотын болон Анхдагч илгээлтийн эзэд”-ийн өдөр  болгосны дагуу долоо дахь жилдээ тэмдэглэж байна.  Аймаг орон нутгийн удирдлагууд жил бүрийн  “Эрдэнэт  хотын болон  Анхдагч илгээлтийн эздийн өдөр”-т онцгой ач холбогдол өгч зохион байгуулдаг уламжлалтай. Тэр хэрээрээ иргэдийн хүсэн хүлээдэг  баярын өдөр болсон. 

Жил бүрийн энэ өдөр  аймаг орон нутгийнхаа хөгжилд үнэтэй хувь нэмэр оруулсан иргэдээ Орхон аймаг, Эрдэнэт хотын “ХҮНДЭТ ИРГЭН”-ээр өргөмжилж,  иргэдийнхээ хамтаар шинэ бүтээн байгуулалтаа  хүлээн авах, аймгийн болон “Эрдэнэт үйлдвэр” ТӨҮГ-ын  музей үнэ төлбөргүй үйлчлэхээс эхлээд соёл урлагийн олон сонирхолтой үзвэр үйлчилгээг иргэддээ толилуулж ирсэн. Түүнчлэн  худалдаа үйлчилгээний байгууллагууд хямдралтай үнээр үйлчлэх гээд салбар бүрийг хамарсан үйл ажиллагаа  эдгээр өдрүүдэд өрнөдөг. 

Энэ жилийн Орхон аймаг, Эрдэнэт хотын “ХҮНДЭТ ИРГЭН” -ээр Монгол Улсын Хөдөлмөрийн баатар, гавьяат тамирчин Э. Содномпилжээ тэргүүтэй Эрдэнэт хотын бүтээн байгуулалт хөгжил дэвшилд манлайлагч байж, залуу үедээ үлгэр жишээ болж яваа дөрвөн эрхмийг шалгаруулж, өргөмжиллөө. 

Мөн аймгийн Жаргалант сумын ОНХС-ийн 5.5 тэрбум төгрөгийн хөрөнгө оруулалтаар 30 айлын орон сууцыг барьж, өнөөдөр ашиглалтад хүлээн авлаа. ОНХС-ийн хөрөнгө оруулалтаар Монгол Улсын хэмжээнд суманд баригдсан анхны бүтээн байгуулалт гэдгээрээ онцлогтой. 
Аймгийн Засаг дарга Б.Зоригтбаяр тус орон сууцны  анхны оршин суугчид  түлхүүрийг  гардуулсан нь Жаргалант сумынхаа ЕБС-д гурван жилийн өмнө урилгаар ирэн  багшилж буй Батбаяр багшийн гэр бүл байв. 

Дэлхийн болон Монголынхоо сонгодог  уран бүтээлийн дээжсийг аймаг орон нутагтаа үзэх, сонсох боломжийг “Эрдэнэт хотын болон Анхдагч илгээлтийн эзэд”-ийн өдрөөр олгодог нь иргэдийн талархлыг хүлээгээд буй. 2022 онд УДЭТ-ын хамт олны бүтээл  дэлхийн сонгодог бүтээл Анна Каренина, 2023 онд Төрийн тэргүүн зэргийн “Чингис хаан” одонт,  Монгол Улсын Соёлын элч, улсын филармоний Морин хуурын чуулгын уран бүтээлчид шилмэл уран бүтээлийн дээжсээсээ толилуулж байв. 

Харин энэ жил улсын филармоний  Төрийн шагналт “Баян Монгол” чуулгын “Сэтгэлд хоногшсон дуунууд”   эгшиглэж байна.

  Энэ жилийн  “Эрдэнэт хотын болон Анхдагч илгээлтийн эзэд”-ийн өдөр өмнөх  жилүүдээс онцлогтой. Дотоодын аялал жуулчлалыг хөгжүүлэх, уул уурхайн салбараа сурталчлах зорилгоор өнгөрсөн жилээс эхлүүлсэн  “Зэс фестиваль”-ийг энэ жил хамтатган зохион байгуулж байна.  

Монгол Улсын Засгийн газраас аялал жуулчлалын салбарыг эдийн засгийн тэргүүлэх эгнээнд авч үзэн 2023-2025 оныг “Монголд зочлох жил”-ээр зарласан.  Энэ хүрээнд Орхон аймаг  орон нутгийн төдийгүй, Монгол Улсын нэрийн хуудас болох арга хэмжээг “Зэс фестиваль” гэж үзэж буй.  Орхон аймагт 5000 гаруй аж ахуйн нэгж үйл ажиллагаа явуулдагаас  уул уурхайн чиглэлээр үйл ажиллагаа явуулдаг таван аж ахуйн нэгж бий. Мөн зэсээр эцсийн бүтээгдэхүүн үйлдвэрлэдэг иргэн, ААНБ-уудаа Зэс фестиваль”-иар олон нийтэд таниулж, сурталчилдаг билээ. Энэ хүрээнд зэс, зэсэн эдлэлийн бүтээгдэхүүний үзэсгэлэн худалдааг хол ойрын зочид  төлөөлөгчид болон иргэддээ  энэ өдрүүдэд толилуулж байна. 

Мэдээллийн төв