Гурван замын уулзвар дээрх төлбөр хураах цэгийг нүүлгэх ажил энэ сард эхэлнэ
Гурван замын уулзвар дээрх төлбөр хураах цэгийг нүүлгэн шилжүүлэх асуудлаар өнөөдөр “Зам, тээврийн хөгжлийн төв” ТӨҮГ-ын захирал Х.Пүрэвжаргал манай аймагт ажиллалаа. Тэрээр энэ есдүгээр сард багтаан нүүлгэн шилжүүлэх ажлыг эхлүүлнэ гэв.
Төлбөр хураах цэгийг Жаргалант сумын тээврийн цагдаагийн хяналтын цэгийн ойролцоо байгуулна. Учир нь тус байршилд цахилгааны эх үүсвэрийг шийдвэрлэх, авто замын даланг өргөсгөх ажлууд хийхэд тохиромжтой гэдгийг мэргэжлийн хүмүүс хэлж байна.
Нүүлгэн шилжүүлэлтийн ажлыг орон нутгийн төсвийн хөрөнгө оруулалтаар гүйцэтгэх бөгөөд тендер шалгаруулалт энэ сарын 11-ний өдөр нээгдэнэ. Ажил гүйцэтгэгч шалгарсанаар есдүгээр сарын сүүлээс эхлэн нүүлгэх ажлыг эхлүүлж зам барилгын бүтээн байгуулалтын ажил зогсохоос өмнө дуусгах ажээ.
Улсын чанартай авто замаас төлбөр хураах нийт 32 цэг ажилладаг. Зам тээврийн яамны зүгээс эдгээр цэгүүдийг цахимжуулах ажлыг эхлүүлсэн бөгөөд Орхон аймгийн төлбөр хураах цэг мөн адил цахимжина гэдгийг хэлж байна.
Жин тонн хэтрүүлж ачсан том оврын авто машинуудын тээвэрлэлтээс үүдэж авто замд эвдрэл ихээр үүсдэг. Үүнд хяналт тавих үүднээс цаашид зөвхөн төлбөр хураах зориулалтаар ажиллуулах бус даацын хяналт пүү байрлуулах зэрэг ажлуудыг шат дараатай хийнэ гэдгийг “Зам, тээврийн хөгжлийн төв” ТӨҮГ-ын захирал Х.Пүрэвжаргал хэллээ.
Мэдээллийн төв
