Орхон аймаг 2022 оны нийгэм, эдийн засгийн үзүүлэлтээрээ Монгол Улсын шилдэг аймгаар шалгарлаа
Орхон аймаг, Эрдэнэт хот Засгийн газрын үйл ажиллагааны хөтөлбөр, хууль тогтоомжийг орон нутагт амжилттай хэрэгжүүлэн ажиллаж, 2022 оны ажил, нийгэм эдийн засгийн үзүүлэлтээрээ Монгол Улсын шилдэг аймгаар шалгарлаа.
Орхон аймаг 2022 онд их бүтээн байгуулалт “Орлогод нийцсэн орон сууц” төслийг эхлүүлж, орон нутгийн төсвөөр 260 айлын орон сууцыг барьж байна. Мөн хотын хөгжлийн ирээдүйн чиг хандлагад тулгуурлан, дахин төлөвлөлтийн ажил 2022 онд амжилттай эхлүүлсэн билээ.
Хотын доторх нийтийн тээврийн үйлчилгээг сайжруулах зорилгоор орон нутгийн төсвийн хөрөнгө оруулалтаар 12 ширхэг дунд оврын автобусаар парк шинэчлэл хийж, аж ахуй нэгж байгууллагуудад дэмжлэг болгон хүлээлгэн өгөв.
Нийтийн тээврийн үйлчилгээнд явж байгаа автобуснуудын техникийн үзүүлэлт, өнгө үзэмж муудсан, дийлэнх нь 12 жилээс дээш насжилттай автобусыг шинэчилснээр үйлчилгээ сайжирлаа.
Цахим аймаг болох зорилтыг дэвшүүлэн иргэдийн ажиллаж, амьдрах, бизнес эрхлэх таатай нөхцлийг бүрдүүлсэн, төрийн цахим үйлчилгээ бүхий, байгаль орчинд ээлтэй ухаалаг аймаг, хот болох зорилгоор “Цахим-Эрдэнэт 1” хөтөлбөрийг хэрэгжүүлж байна. Энэ ажлын хүрээнд 24 цагаар 215 үйлчилгээ авах боломжтой “Цахим төв”-ийг ашиглалтад оруулсан.
Мөн иргэдийн санал хүсэлтийг хүлээн авах Цахим булан Баян-Өндөр сумын бүх багт ажиллуулж эхэллээ. Ингэснээр иргэд баг дээрээ очиж цахимаар төрийн байгууллагатай холбоотой санал, хүсэлт, өргөдөл, гомлоо гаргахын зэрэгцээ шийдвэрлэлтээ авах боломжийг бүрдүүлэх ажлыг орон нутгуудаас анхлан эхлүүллээ.
Түүнчлэн Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд 20 сая мод тарьж ургуулахаар “Ногоон Эрдэнэт” хөтөлбөр, хог хаягдлыг бууруулах, хог хаягдлыг сэргээн ашиглах, тээвэр ложистикийн менежментийн тогтолцоог сайжруулж, дэд бүтэц, санхүүгийн чадавхийг бэхжүүлэх зорилгоор “Хог хаягдлын менежментийг сайжруулах” төсөл зэрэг олон төсөл хөтөлбөрүүдийг амжилттай хэрэгжүүлж байна.
Орхон аймаг, Эрдэнэт хотын 106 мянга гаруй иргэд, “Эрдэнэт үйлдвэр” ТӨҮГ тэргүүтэй татвар төлөгч 8000 гаруй аж ахуйн нэгж байгууллага, 4000 гаруй төрийн албан хаагчид болон нийт Эрдэнэтчүүдийн шагнал гэдгийг аймгийн удирдлагууд онцолж байна.
Мэдээллийн төв
