ӨЭМТ, хувийн хэвшлийн эмнэлгүүдтэй 2023 оны хамтын ажиллагааны гэрээ байгууллаа
Өрхийн эрүүл мэндийн найман төв, хувийн хэвшлийн 12 клиник эмнэлэгийн удирдлагуудтай 2023 оны хамтын ажиллагааны гэрээг Засаг дарга С.Батжаргал өнөөдөр байгууллаа. Жил бүр Өрхийн эрүүл мэндийн төвүүд, хувийн хэвшлийн ортой эмнэлгүүд аймгийн Засаг дарга, Эрүүл мэндийн газартай хамтарсан гэрээ байгуулан ажиллаж ирсэн билээ.
2022 онд найман өрхийн эрүүл мэндийн төв, хувийн хэвшлийн эрүүл мэндийн 12 ортой эмнэлэгтэй гэрээ байгуулж, гэрээний хэрэгжилт дунджаар 90,2 хувьтай дүгнэгдсэн байна. Энэ нь өмнөх оноос 2,2 хувиар, хувийн хэвшлийн ортой эмнэлгүүдтэй байгуулсан гэрээний хэрэгжилт дунджаар 93 хувь болж өмнөх оноос 5,5 хувиар нэмэгдсэн үзүүлэлт юм.
Эрүүл мэндийн байгууллагуудтай байгуулсан хамтын ажиллагааны гэрээнд...
- Эрүүл мэндийн сайд, аймгийн Засаг даргатай 2023 онд хамтран ажиллах гэрээ
- Аймгийг 2023 онд хөгжүүлэх жилийн төлөвлөгөө
- Салбарын 2023 оны бодлого, төлөвлөлтийг нэмж тусган оруулж байгаагаараа энэ жилийн хамтын ажиллагааны гэрээг онцлог болж байгааг Засаг дарга С.Батжаргал хэлсэн.
Мөн тэрээр, хүрсэн амжилтаа улам бататган, салбартаа шинэчлэлийг хэрэгжүүлж, бодитой үр дүнд хүрч ажиллахад орон нутаг, эрүүл мэндийн салбарын удирдлагууд та бидний хамтын хүчин зүтгэл нэн чухал гэдгийг онцлон хэллээ.
2022 онд Өрхийн эрүүл мэндийн төвүүд 115 мянга 635 үзлэг хийсэн нь аймгийн хэмжээнд хийгдсэн нийт үзлэгийн 51хувийг, хувийн хэвшлийн эрүүл мэндийн байгууллагууд 19633 иргэнийг хэвтүүлэн эмчилсэн нь нийт эмнэлэгт хэвтэн эмчлүүлэгчийн 51.3 хувийг эзэлж эрүүл мэндийн тусламж үйлчилгээний ачааллыг хуваалцсан байна. Мөн Өрхийн эрүүл мэндийн төвүүдийн санхүүжилт 2 дахин нэмэгдэж, тоног төхөөрөмжийн хангалт 95 хувь, нарийн мэргэжилтнүүдийн эзлэх хувь 60 хувьд тус тус хүрсэн байна. Энэ хэрээр тусламж үйлчилгээний нэр төрөл, чанар хүртээмж нэмэгдсэнээр иргэдийн сэтгэл ханамж 94 хувьтай үнэлэгдэн, өргөдөл, гомдол 40.7 хувиар буурчээ.
Хувийн хэвшлийн эрүүл мэндийн байгууллагуудын оношилгооны чадавх 85 хувь болж өмнөх оны мөн үетэй харьцуулахад 15 хувиар нэмэгдсэн байна. Амбулатори, сэргээн засах, өдрийн эмчилгээний тусламж үйлчилгээ зэрэг 3-5 төрлийн тусламж үйлчилгээг нэмэгдүүлэн үйлчлүүлэгчийн хүлээгдлийг өмнөх оноос 1,2 дахин бууруулж чадсан зэрэг олон амжилтыг гаргажээ.
Мэдээллийн төв
