Цэцэрлэгийн хүүхдүүдээс шээсний шинжилгээ огт авахгүй, ирэх аравдугаар сард цагаан хорхойн шинжилгээ авна
2022-2023 оны хичээлийн шинэ жил эхлэхэд хэдхэн хоног үлдээд байна. Өнөөдөр Засаг даргын зөвлөлийн 16 дахь удаагийн хураал хуралдаж, хичээлийн жилийн бэлтгэл ажлын талаарх мэдээллийг сонсч, хэлэлцлээ.
Жил бүрийн есдүгээр сарын 1-нд цэцэрлэгийн хүүхдүүдээс цагаан хорхой, шээсний шинжилгээ авдаг. Тэгвэл энэ жил дээрх хоёр шинжилгээг авахгүй юм байна. Тодруулбал, ирэх аравдугаар сарын 1-нээс 15-ны өдрүүдэд тухайн цэцэрлэг дээр нэгдсэн байдлаар цагаан хорхойн шинжилгээ авах ажлыг зохион байгуулах бол шээсний шинжилгээг огт авахгүй юм байна.
Харин Өрхийн эрүүл мэндийн төвөөс ханиад томуу хүрээгүй, эрүүл бойжиж байгаа гэсэн бичиг авч ирэх шаардлагатай талаар аймгийн БШУ-ны газрын дарга О.Ариунгэрэлт хэлсэн.
Энэ талаар Засаг даргын зөвлөлийн гишүүд цагаан хорхой, шээсний шинжилгээг шаардлагагүй гэж үзэж байгаа бол Өрхийн эмнэлгээс авах эрүүл бойжиж байгаа гэсэн бичиг зайлшгүй шаардлагатай юу. Өрхийн эмнэлгүүд дээр ачаалал үүсэх, эрүүл хүүхэд ханиад томуу тусахгүй байхыг үгүйсгэхгүй. Аль аль талдаа хүндрэл учруулахгүйгээр зохион байгуулах саналыг дэвшүүлсэн.
Үүнд, ЗДТГ-ын Нийгмийн бодлогын Эрүүл мэндийн асуудал хариуцсан мэргэжилтэн О.Батцэнгэл “Сүүлийн гурван сарын дотор халдварт өвчин голомтолж гарсан тохиолдолд хүүхдийг цэцэрлэгт хамруулахгүй байх заалттай. Тиймээс МХГ болон бусад холбогдох байгууллагуудтай хэлэлцсэний үндсэн дээр тухайн айл өрхөд халдвар гараагүй, хүүхэд эрүүл гэсэн бичиг авах нь зүйтэй гэж үзсэн. ӨЭМТ-үүд голомтолж халдвар гарсан айл өрхийн судалгааг гаргасан” гэлээ.
Уг асуудлаар маргааш МХГ, ЭМГ, БШУГ хуралдаж хэлэлцэхээр боллоо. Хурлаас гарсан шийдвэрийг эргэн мэдээлэх болно.
Мэдээллийн төв
