Эрүүл мэндийн салбарт гурван жилийн хугацаанд 8 тэрбум төгрөгийн хөрөнгө оруулалт хийжээ
Жил бүрийн наймдугаар сарын хоёр дахь долоо хоногийг “Эмнэлгийн ажилтны баяр” болгон тэмдэглэн өнгөрүүлдэг. Өнөөдөр “Эрүүл мэндийн ажилтны өдөр”-т зориулсан ёслол хүндэтгэлийн үйл ажиллагаа А.Амарын танхимд боллоо. Энэ үеэр эрүүл мэндийн салбарт олон жил үр бүтээлтэй ажилласан эмч эмнэлгийн ажилчдыг салбарын болон орон нутгийн шагналаар шагнаж урамшуулав. Шагналыг аймгийн Засаг дарга М.Түмэнжаргал болон ЭМГ-ын дарга Ц.Мөнхцэцэг, БОЭТ-ийн эмчилгээ эрхэлсэн дарга М.Алтанбек нар гардууллаа.
Аймгийн хэмжээнд эрүүл мэндийн салбарт 2073 ажилтан, албан хаагч, эмч, эмнэлгийн мэргэжилтнүүд ажиллаж байна. Орхон аймаг эрүүл мэндийн тусламж үйлчилгээг сайжруулахад анхаарч сүүлийн гурван жилийн хугацаанд 8 тэрбум төгрөгийн хөрөнгө оруулалт хийжээ. Ингэснээр гурав дахь шатлалын эмнэлэгээр үйлчлүүлэх иргэдийн тоо багассан талаар аймгийн Засаг дарга М.Түмэнжаргал онцоллоо.
Мөн орон нутгуудаас анх удаа Орхон аймаг “Эмч” хөтөлбөрийг найм дахь жилдээ хэрэгжүүлж байгаа юм. Сүүлийн гурван жилийн хугацаанд давхардсан тоогоор 7000 гаруй ажилтан эрүүл мэндийн үзлэг, гадны улс орнуудад болон дотооддоо сургалтад хамрагджээ.
Мэдээллийн төв
