Авто замд нарийн ширхэгт хайрга асгаж халтиргаа гулгаанаас сэргийлэх үүрэг өглөө
Аймгийн Засаг даргын шуурхай хуралдааныг аймгийн Засаг даргын албан үүргийг түр орлон гүйцэтгэгч М.Түмэнжаргал удирдан явууллаа.
Шуурхай хуралдааны эхэнд өнгөрсөн долоо хоногт өгсөн үүрэг даалгаврын хэрэгжилт, иргэдийн санал гомдол хүлээн авах 70353511 дугаарын утсанд ирсэн өргөдөл гомдлын шийдвэрлэлтийн талаарх мэдээллийг сонслоо.
Өнгөрсөн долоо хоногт 25 багийн 444 аж ахуй нэгж, байгууллагын 1128 ажилтан, хөршийн холбооны ахлагч, хүнсний талонд хамрагддаг 194 иргэний оролцоотой авто замд 11887м2, явган зам 40099м2, нийтийн эзэмшлийн 22104м2 нийт 74099м2 талбайд цэвэрлэгээ хийжээ.
Амралт баяр ёслолын өдрүүдэд аймгийн хэмжээнд, гал түймрийн аюулаас урьдчилан сэргийлэх зорилгоор ОБГ-аас орон сууцны хороололд “подваль”, аймгийн хэмжээнд “шинэ жил” нэгдсэн арга хэмжээнүүдийг зохион байгуулж зааварчилгаа, үйлчилгээг үзүүлж байна.
Шуурхай хуралдааны үеэр худалдан авах ажиллагааг нээлттэй ил тод зохион байгуулж байгаа талаар мэдээлэл хүргэх, баяр ёслолын өдрүүдэд хариуцлагатай жижүүр ажиллуулах талаар танилцуулах, замын халтиргаа гулгаанаас сэргийлж авто замд нарийн ширхэгт хайрга асгах, нийтийн эзэмшлийн зам талбайн цэвэрлэгээ үйлчилгээг тогтмол хийх зэрэг үүрэг даалгаврыг өглөө.
Мэдээллийн төв
