Дуу хөгжмийн багш С.Сайнбилэг: “Хүүхдийн хөгжил” төсөл ирээдүйн Монгол Улсын иргэдийг хөгжүүлж, төлөвшүүлж байна
Эрүүл зөв дадалтай, иргэнийг төлөвшүүлэх зорилгоор “Хүүхдийн хөгжил” төслийг орон нутгийн санхүүжилтээр хоёр дахь жилдээ хэрэгжүүлж байна. Хүүхэд бүрийн авьяасыг нээх, хөгжүүлэх, зөв дадлыг төлөвшүүлэх нь энэхүү төслийн зорилго юм. Төслийн үр дүнд ерөнхий боловсролын сургуулиудад амьд хөгжмийн хамтлаг мэндэлж, хүүхдүүд хөгжмөөр хичээллэх сонирхол нэмэгджээ. Тухайлбал, ерөнхий боловсролын 14 дүгээр сургуулийн 12 дугаар ангийн сурагчдын амьд хөгжмийн SKYlINE хамтлаг өнгөрсөн хавар анхны бие даасан тоглолтоо хийж байв. Өдгөө тус хамтлагийн гишүүд дуу хөгжмийн багш, хуульч, эмч мэргэжлээр суралцаж буй.
Тэдний залгамж халааг доод ангийн сурагч дүү нар нь авч PARADISO /диваажин/ амьд хөгжмийн хамтлагыг байгуулан, бэлтгэл сургуулилтаа эхлүүлжээ. Мөн төслийн хүрээнд ерөнхий боловсролын сургуулиудад үкүлэлэ хөгжим олгосноор өдгөө сургууль бүрт үкүлэлэ хөгжмийн дугуйлан хичээллэж байна.
“Хүүхдийн хөгжил” төслийг ахалж хэрэгжүүлсэн ерөнхий боловсролын 14 дүгээр сургуулийн хөгжмийн багш С.Сайнбилэг:
-Орхон аймаг хөгжимлөг аймаг. Үүгээрээ ч бусад аймаг орон нутгаас ялгарч чаддаг гэж бид боддог. Үкүлэлэ хөгжмийг аймгийн хэмжээнд давхардсан тоогоор хоёр, гурван мянган хүүхэд тоголж сурсан. Миний хувьд сургууль дээрээ 800 гаруй хүүхдэд үкүлэлэ хөгжмийг зааж сургасан байна.
Орчин үед аав, ээжүүд хүүхдээ хөгжмөөр хичээллүүлэх хандлага нэмэгдсэн. Учир нь хөгжим тоглоход хүний баруун, зүүн тархи зэрэг ажилладаг. Хичнээн сайн шатар тоглодог байсан ч ганцхан баруун тархи ажилладаг. Үүнийг олж харсан эцэг, эхчүүд хүүхдүүдээ аль болох хөгжимд дурлуулах болсон. Хоёр тархи нь зэрэг ажиллаж сурч, хөгжиж байгаа хүүхэд ирээдүйд ямар боловсон хүчин болох вэ гэдэг нь тодорхой. Тийм ч учраас “Хүүхдийн хөгжил” төсөл цаг үеэ мэдэрч хэрэгжиж эхэлсэн, ирээдүйн Монгол Улсын иргэдийг хөгжүүлэхэд асар их үүрэг гүйцэтгэж байгаа гэдэгт би итгэл дүүрэн байдаг.
Мэдээллийн төв
