Сурагчид гидропоник аргаар навчит ногоо тарьж, эрүүл зөв хооллолтод суралцаж байна

Эрүүл зөв дадалтай, иргэнийг төлөвшүүлэх зорилгоор орон нутгийн санхүүжилтээр “Хүүхдийн хөгжил” төслийг ЗДТГ-аас хэрэгжүүлж буй. Уг төслийг хэрэгжүүлж байгаа аймгийн ерөнхий боловсролын VII сургуулийг онцоллоо. Төслийн хүрээнд тус сургуульд хоол хүнсний технологийн иж бүрэн кабинетыг тохижуулсан. Шарах шүүгээ, будаа агшаагч, холигч, хутга, сэрээнээс эхлээд гол тогоонд байдаг бүх зүйлс тэнд байна.

Тэдгээрээс гадна гидропоник аргаар бууцай, юуцай, шанцай гэгчлэн навчит ногоо тарьж, эрүүл зөв хооллолтод дунд ахлах ангийн сурагчид суралцаж байна.

Гидропоник систем гэдэг нь хөрсгүй орчинд ургамал тариалах орчин үеийн шинэ технологи юм. Ажиллах зарчим нь их энгийн. Тусгайлан бэлтгэсэн хоолойгоор ургамалд нэн хэрэгцээт шим тэжээлийг уусгасан усыг гүйлгэж, түүндээ ямар ч хөрс хэрэглэхгүйгээр ургамлын тэжээллэг орчинг хангадаг аж. Энэ технологийг ашиглаж тус сургуулийн дунд, ахдах ангийн сурагчид өөрсдийн гараар тарьсан шинэ ногоогоор эрүүл зөв хоол бэлтгэж сурчээ.

Энэ талаар тус сургуулийн 11А ангийн сурагч Б.Тунгалаг ийн ярилаа.

-Бид гидропоник аргаар буюу хөрс ашиглахгүйгээр бордоо, ус, нарны болон төхөөрөмжийнхөө гэрлийг ашиглаж навчит ургамал тарьж, 21 хоног тутамд ургацаа хурааж авдаг. Түүгээрээ төрөл бүрийн смүүти, шэйк хийдэг. Энэ миний хамгийн дуртай хичээлийн танхим. Ангийнхаа найзуудын хамтаар энд өөрсдийн гараар төрөл бүрийн амттан хийж, эрүүл зөв хооллолтод сурч байгаа.

Эрүүл мэндийн хичээлийг ганцхан дэвтэр дээр бичиж, номноос авахаас илүүтэй өөрсдийн гараар бодитоор туршиж, судалж хийх нь илүү их мэдлэгийг өгч байна. Жишээ нь, өглөөний цай уухын ач тус, эрүүл зөв хооллолт гэж юуг хэлээд байна вэ, ямар хүнсний бүтээгдэхүүн хүний биед илүү шим тэжээлтэй вэ гэхчлэн олон талын мэдлэгийг авч байна. Энэ нь сурагч бидний насан туршийн эрүүл мэндийн боловсролд хийж буй том хөрөнгө оруулалт шүү дээ. Би ирээдүйд ээж болно. Одооноос эрүүл хоол бэлтгэж сурах нь надад хамгийн их хэрэгтэй зөв мэдлэг.

Хамгийн гол нь өөрийнхөө болон хайртай хүмүүсийнхээ эрүүл мэндийг хамгаалах ийм том мэдлэгийг арван жилдээ авч байгаад олзуурхаж байна. Манай сургуульд ийм гоё танхим байгуулж өгсөнд баярлалаа гэж хэлмээр байна.

Мэдээллийн төв