УИХ-ын Ёс зүй, сахилга хариуцлагын байнгын хороо, ЗГХЭГ,  УИХ-ын Тамгын газар Төрийн албаны зөвлөлтэй хамтран “Төрийн албан хаагчийн ёс зүй, гүйцэтгэлийн удирдлага” сэдэвт  хоёр өдрийн сургалтыг Орхон аймагт зохион   байгуулж буй.  Сургалтад нийслэл, 21 аймгийн Төрийн албаны салбар зөвлөлийн Нарийн бичгийн дарга нар болон Орхон аймгийн хэлтэс, агентлагуудын удирдлагууд хамрагдаж байна. 

 Энэхүү сургалтын зорилго нь төрийн албан хаагчийн ёс зүй, манлайлал, гүйцэтгэл, үр дүн, төрийн байгууллагын бүтээмжийг дэмжих юм. Өчигдөр сургалтын эхний өдөр 21 аймгаас ирсэн төлөөлөл Орхон аймаг, Эрдэнэт хотын цахимжуулалтын чиглэлээр хийж хэрэгжүүлж буй ажлын талаар мэдээлэл сонсож аймгийн Цахим төв, Цахим архив, Мэдээлэл шуурхай удирдлагын төв, төрийн анхан шатны үйлчилгээг иргэдэд хүргэж буй Яргуйт, Даваат зэрэг багийн үйл ажиллагаатай танилцсан юм. 

Орхон аймгийн хэмжээнд нутгийн  захиргааны болон төрийн үйлчилгээний 92 байгууллагад 4736 төрийн албан хаагч ажиллаж байна. Үүнийг албан тушаалын ангиллаар нь авч үзвэл төрийн захиргааны албанд 440 төрийн албан хаагч, төрийн тусгай албанд 82, төрийн улстөр албанд 35, төрийн үйлчилгээний албанд 4179  албан хаагч төрийн үйлчилгээг  29,1 мянган өрхийн 106.2 мянган хүн амд үзүүлж  буй. 

УИХ-аас баталсан   “Алсын хараа - 2050” урт хугацааны  хөгжлийн  бодлогыг үр дүнтэй хэрэгжүүлэх, “Шинэ сэргэлтийн бодлого”-д төрийн бүтээмжийг сайжруулах зорилгын хүрээнд аймгийн ИТХ-ын 2022 оны арванхоёрдугаар сарын 1-ны өдрийн 13/05 дугаар тогтоолоор “Төрийн албан хаагчдын хөгжлийн хөтөлбөр”-ийг  батлуулан хэрэгжүүлж байгаа билээ. 
2023 онд орон нутгийн төсвөөс 300  сая төгрөг шийдвэрлэн хэд хэдэн ажил арга хэмжээг хэрэгжүүлж байна. Тухайлбал, хөтөлбөрийн хүрээнд  энэ оны нэгдүгээр сард аймаг дахь Төрийн албаны Салбар зөвлөлд “Төрийн албан хаагчдын сургалтын танхим”-ыг байгуулж, 20 суурин комьютер, 2 лед дэлгэц, камер, ширээ сандал болон бусад шаардагдах тоног төхөөрөмжөөр хангалаа гэж Засаг дарга С.Батжаргал  онцлов. 

Үүний дараа Төрийн албаны зөвлөлийн дарга Б.Баатарзориг “Төрийн албаны зөвлөлөөс энэ жил 21 аймагт шалгалтын үйл ажиллагаа явуулсан. 21 аймгаас цахим хөгжил, төрийн үйлчилгээний цахимжуулалт,  иргэдэд үзүүлж байгаа төрийн үйлчилгээ, үр дүн  сайн байсан гэж хэлэлцэгдсэн  нэг аймаг нь Орхон  байсан юм.   Энэ утгаараа Орхон аймаг, Эрдэнэт хотын төрийн үйлчилгээ, төрийн албаны цахимжуулалтыг бусад аймгуудад сайн туршлага болгоё гэдэг үүднээс энэ удаагийн сургалтаа Орхон аймагт зохион байгуулж  байна” гэлээ. 

Мөн тэрээр, энэ цаг үед төрийн албаны шинэтгэл эрчимтэй өрнөж байна. Бүхий л шинэчлэлийн суурь нь ёс зүйн асуудал. Төрийн албан хаагчийн ёс зүйн харилцааа, хандлага юм. УИХ-ын хаврын нэгдсэн чуулганаар  Төрийн албан хаагчийн ёс зүйн тухай анхдагч хууийг баталж,   долоодугаар сарын 4-ны өдрөөс эхлэн мөрдөж эхэлсэн. 

Ялангуяа, төрийн албан хаагчид тэр дундаа төрийн хөндөр албан тушаал хашиж байгаа хүмүүсийн ёс зүйн зөрчилтэй холбоотой асуудал, иргэдийн итгэлийг сэргээхтэй холбоотой асуудал, иргэдэд үзүүлэх төрийн үйлчилгээг чанаржуулах асуудлууд энэ хуульд орсон. Энэ өдрийн сургалтаар УИХ-аас баталсан Төрийн албан хаагчийн ёс зүйн тухай хууль, Засгийн газраас шинэчлэн баталсан  Төрийн жинхэнэ албан хаагчийн  гүйцэтгэлийн төлөвлөгөө, ажлын гүйцэтгэл үнэлэх журам, Хүний нөөцийн удирдлагын мэдээллийн тогтолцоо, Төрийн албан хаагчийн цалингийн систем зэрэг сэдвүүдээр өргөн мэдээллийг авч аймаг орон нутгатаа мэдээллийг хүргэж, хэрэгжүүлж ажиллана гэдэгт итгэлтэй байна гэлээ. 

Мэдээллийн төв