Захирамжийн төсөлд иргэн, ААНБ-аас санал авч байна

Аймгийн хэмжээнд согтууруулах ундаа худалдах, түүгээр үйлчлэх болон нутаг дэвсгэр дээр үйл ажиллагаа явуулж байгаа цахим тоглоомын газар, интернэт кафе болон барьцаалан зээлдүүлэх үйлчилгээний ажиллах цагийн хязгаарыг шинэчлэн батлах тухай аймгийн Засаг даргын шийдвэрийн төсөлд санал авч байна. Захиргааны ерөнхий хуулийн 62 дугаар зүйлд зааснаар 30 хоногийн хугацаанд санал авна.

Саналаа иргэдийн санал хүсэлтийг хүлээн авах 70353511 дугаарын утасны хуулийн зөвлөгөө өгөх 2 шугамыг сонгож өгнө үү. Мөн info@erdenet.mn и-мэйл хаягаар ирүүлнэ үү.

Аймгийн Засаг даргын захирамжийн төсөлтэй танилцана уу.

Цагийн хязгаар тогтоох тухай

Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 60 дугаар зүйлийн 60.1.1, 60.1.21 дэх заалт, Согтууруулах ундааны эргэлтэд хяналт тавих, архидан согтуурахтай тэмцэх тухай хуулийн 16 дугаар зүйлийн 16.2 дахь хэсэг, 23 дугаар зүйлийн 23.1 дэх хэсэг, Гэмт хэрэг, зөрчлөөс урьдчилан сэргийлэх тухай хуулийн 28 дугаар зүйлийн 28.1.11 дэх заалт, Хүнс, хөдөө аж ахуй, хөнгөн үйлдвэрийн сайдын 2023 оны А/419 дүгээр тушаалыг тус тус үндэслэн ЗАХИРАМЖЛАХ нь:

1. Согтууруулах ундаа худалдах, үйлчлэх тусгай зөвшөөрөлтэй худалдаа, үйлчилгээний газруудын согтууруулах ундаа худалдах, үйлчлэх цагийн хязгаарыг I дүгээр, харьяа нутаг дэвсгэр дээр үйл ажиллагаа явуулж байгаа цахим тоглоомын газар, интернэт кафе болон барьцаалан зээлдүүлэх үйлчилгээний ажиллах цагийн хуваарийг II дугаар хавсралтаар тус тус баталсугай.

2. Дээрх үйлчилгээ эрхлэгч худалдаа, үйлчилгээний газруудын цагийн хуваарийг аж ахуйн нэгжүүдийн хүсэлтийг харгалзан баталгаажуулж ажиллахыг Баян-Өндөр сум (Б.Баасансүрэн), Жаргалант сум (Б.Зоригтбаяр)-д, үйл ажиллагаанд холбогдох хууль, стандартыг хангуулж, хяналт тавьж ажиллахыг аймгийн Засаг даргын Тамгын газрын Хууль эрх зүйн хэлтэс (М.Мөнхбаяр), Хөгжлийн бодлого, төлөвлөлт, хөрөнгө оруулалтын хэлтэс (С.Даваадорж), Цагдаагийн газар (А.Лхагвадорж), Хүнс, хөдөө аж ахуйн газар (Ж.Бат-Өлзий), Стандарт, хэмжил зүйн хэлтэс (С.Чулуунбат), аж ахуйн нэгж, байгууллагын удирдлагуудад тус тус үүрэг болгосугай.

ЗАСАГ ДАРГА С.БАТЖАРГАЛ