“Ойска Монгол” НҮТББ-тай хамтран ойг нөхөн сэргээх, моджуулах төсөл хэрэгжүүлнэ
Япон Хятадын найрамдлын төв, Ойска Монгол НҮТББ -ын зүгээс “Монголын хойд бүс нутгийн ой модыг нөхөн сэргээх зорилгоор иргэдийн оролцоотой мод тарих төсөл”-ийг хэрэгжүүлэхээр Орхон аймгийг сонгон авчээ.
Төсөл хэрэгжүүлэх ажлын танилцуулга уулзалтыг хийхээр Япон улсын Элчин сайдын яамны Улс төрийн хэлтсийн дарга Кояма Исао болон Ойска Монгол ТББ-ын Ерөнхий нарийн бичгийн дарга Г.Нинжингээр ахлуулсан ажлын хэсэг манай аймагт ажиллалаа. Тэдгээр хүмүүсийг аймгийн Засаг даргын орлогч А.Түвшинжаргал, ХБТХОХ-ийн дарга С.Даваадорж, бусад албаны хүмүүс хүлээн авч уулзлаа.
Төслийн зорилго нь гал түймэрт өртсөн талбай, хууль бусаар тайрсан, бэлчээрийн даац хэтэрсэнээс болж багассан ой модыг нөхөн сэргээж, биологийн олон янз байдлыг хамгаалан ногоон бүс байгуулах ажээ. Ингэхдээ ойг тогтвортой хамгаалахын тулд иргэдийн байгаль орчны мэдлэгийг дээшлүүлэх, тэдний оролцоог хангах замаар төслийг хэрэгжүүлнэ гэв. Уг төслийг Монгол улсад өрнөж буй “Тэрбум мод” үндэсний хөдөлгөөнтэй уялдуулан зохион байгуулна.
Төсөл нийт гурван жилийн хугацаанд хэрэгжиж Сибирь шинэс, монос, улиас, гүйлс зэрэг нийт 23500 ширхэг модыг 10га талбайд тарих ажээ. Төслийн эхний үе шат 2023 оны 8-р сараас 2024 оны 8-р сар хүртэл үргэлжлэх бөгөөд энэ хугацаанд бүх тарилтаа хийж дараа дараагийн жилүүдэд арчлалт, хамгаалалт, нөхөн тарилтыг хийхээр төлөвлөжээ.
Мод тарилтыг Баян-Өндөр хайрханы бэлд хийхээр сонгосон бөгөөд нийт 2000 метр хашаа татаж хамгаалалтын бүс үүсгэх юм. Ингэхдээ орон нутаг иргэдийн оролцоог хангаж, идэвхтэй хамруулахыг төрийн бус байгууллагын зүгээс хүслээ.
Мэдээллийн төв
