Нийтийн өмчийг эвдэж, сүйтгэсэн, хулгайлсан иргэдийг олон нийтэд мэдээлж, хохирлыг төлүүлнэ
Аймгийн хэмжээнд хөрөнгө оруулалт бүтээн байгуулалтын ажлыг эвдлэн, сүйтгэж хулгай хийсэн иргэдийг камерээр илрүүлж, хариуцлага тооцохыг өнгөрсөн даваа гаригийн Засаг даргын шуурхай зөвлөгөөнөөр үүрэг болгосон.
Тухайлбал, агаараар татсан байсан Баянбулаг багийн камержуулалтын шилэн кабель, 16 дугаар сургуулийн агаарын шилэн кабель, хорооллын эцэст агаараар татсан шилэн кабелийг автомашинаар дайрч гэмтээсэн хэрэг гарсан. Тус этгээтүүдийг олж гэмтлийг засварлуулан 2.4 сая төгрөгийн хохирлыг барагдуулсан байна. Мөн Цагаанчулуут багийн явган хүний замын гэрэлтүүлгийг эвдсэн хүүхдүүдийн бичлэгийг олон нийтийн сүлжээнд тавьж анхааруулга хүргэжээ.
Мөн энэ сарын 5-нд Их залуу, Яргуйт багийн Овоотын хэсгийг цахилгаанаар хангадаг 6кв-ын цахилгаан дамжуулах агаарын шугамыг ачааны машин мөргөж, нийт 5 дэд станцын 500 гаруй айл өрх цахилгаангүй болгосныг “ЭБЦТС” ТӨХК яаралтай засварлаж арга хэмжээ авсан.
Энэ мэт санаатай болон санамсаргүй байдлаар нийтийн өмчид хохирол учруулсан иргэдийг олон нийтэд зарлаж, хохирлыг барагдуулах болно гэдгийг холбогдох байгууллагуудаас иргэдэд анхааруулж байна.
Мэдээллийн төв
