Нийтийн тээврийн парк шинэчлэлтээр ирж буй 12 автобусны ашиглалтын талаар хэлэлцэв
Засаг даргын зөвлөлийн 24 дэх хуралдаанаар нийтийн тээврийн автобусны ашиглалтын талаар хэлэлцлээ. 2022 онд аймгийн нийтийн тээвэрт томоохон хөрөнгө оруулалт хийж, орон нутгийн санхүүжилтээр 12 автобусыг худалдан авсан.
Өнөөдрийн байдлаар 12 автобусны 10 нь Улаанбаатарт ирсэн бол 2 нь Эрээний хил дээр байгаа гэх мэдээллийг ЗДТГ-ын Хөгжлийн бодлого төлөвлөлт, хөрөнгө оруулалтын хэлтсээс өглөө. Мөн энэ онд нийтийн тээвэрт хийсэн нэг онцлох ажил нь цахим төлбөрийн систем нэвтрүүлсэн явдал юм.
Аймгийн нийтийн тээврийн 6 чиглэлд 23 дунд оврын автобус иргэдэд үйлчилж байгаа. Засаг даргын 2022 оны 2 дугаар сарын 28-ны өдрийн А/86 дугаар захирамжаар Ч7 чиглэлийг шинээр баталсан.
Захирамжаар галт тэрэг ирэх, явах үед цагийн хуваарийн дагуу 2 автобус үйлчилгээнд явж байгаа билээ. Мөн Ч1 Их залуу-Шанд, Ч2 БОЭТ-Есөн-Эрдэнэ чиглэлийн эргэлтийн урт нь 19.7 км болгож, шугаманд ажиллах график цагийн хуваарийг шинэчлэн мөрдүүлснээр тус чиглэлд автобусны эргэх хугацаа богиносч, иргэдийн хүлээлт багассан. Гэсэн хэдий ч өнөөдрийг хүртэл Ч1 чиглэлийн буюу Их залуу багийн чиглэлд иргэдээс санал хүсэлт ирсээр байгаа билээ.
.jpg)
Тиймээс 2023 онд нийтийн тээврийн менежментийг сайжруулж, чанартай хүрээмжтэй үйлчилгээг төр, хувийн хэвшлийн хамтын ажиллагааны үр дүнд хүргэхээр зорьж байна.
12 автобуснаас Жаргалант суманд ахмадууд болон сурагчдад үйлчлэх 1 автобус шилжүүлэхийг, бусад автобуснуудыг ААН-үүдэд хувуурилж, гэрээнд арчилгаа, үйлчилгээтэй холбоотой асуудлыг сайтар тусгах саналыг зөвлөлийн гишүүд дэмжсэн.
Аймгийн ИТХ-ын 2015 оны 3 дугаар тогтоолоор баталсан “Нийтийн тээврийн хэрэгслээр үнэ төлбөргүй зорчих эрх бүхий иргэдийн нөхөн олговорыг хуваарилах, санхүүжүүлэх журам”-ын дагуу нөхөн олговор олгож байгаа. Монгол Улсын зарим хуульд заасны дагуу ахмад настан, хөгжлийн бэрхшээлтэй иргэн, оюутнууд, ажил үүргээ гүйцэтгэж буй цагдаагийн албан хаагчид нийтийн тээврээр үнэ төлбөргүй зорчдог.
Тэдгээрт 2021 онд нэг тэрбум 125 сая төгрөгийн нөхөн олговрыг нийтийн тээврийн үйлчилгээ эрхэлдэг ААН-үүдэд олгосон бол 2022 онд нэ тэрбус 199 сая төгрөгийг олгожээ.
Мэдээллийн төв
