Эрдэнэт хот Эрхэм хүндэт Орхон аймаг, Эрдэнэт хотын нийт иргэд ээ! Та бүхэнд Монгол Улсын шинэ Үндсэн хууль 1992 онд батлагдсаны болон нутгийн удирдлагын шинэ тогтолцоо үүсч хөгжсөний түүхт 30 жилийн ойн баярын халуун мэндийг өргөн дэвшүүлье. 
       1992 онд Монгол Улсын Шинэ үндсэн хууль батлагдаж нутгийн өөрөө удирдах тогтолцоог шинээр хуульчлан баталгаажуулсан билээ. Улмаар Монгол Улсын Засаг захиргаа, нутаг дэвсгэрийн нэгж түүний удирдлагын асуудлыг хуульчлан тогтоосон юм. 
         Орон нутгийн удирдлага нь тухайн нутаг дэвсгэрийн хэмжээнд нэг талаас хурлын байгууллага нөгөө талаас төрийн төлөөлөгч Засаг дарга гэсэн субьектүүд шинээр батлагдан гарсан хууль тогтоомжоор бий болж төрийн удирдлагыг нутгийн өөрөө удирдах ёсны удирдлагатай хослуулан хэрэгжүүлж эхлээд 30 жил болж байна. 
       1994 онд “Аймаг, сум байгуулах тухай” Улсын Их Хурлын 32 дугаар тогтоол гарч Эрдэнэт хотын тэр үеийн хилийн цэсээр тодорхойлогдсон нутаг дэвсгэрт Орхон аймгийг байгуулж,  Найрамдал, Баян-Өндөр хорооны нутаг дэвсгэрт Баян-Өндөр сумыг шинээр байгуулж, Жаргалант хороог Жаргалант сум болгосон түүхтэй. Түүхийн 30 жилийн хугацаанд нийт 8 удаагийн орон нутгийн сонгууль холбогдох хуулийн дагуу зохион байгуулагдаж сум, аймгийн Иргэдийн Төлөөлөгчдийн Хурлууд сонгогдон зохион байгуулагдаж хуулийн хугацаанд бүрэн эрхээ амжилттай хэрэгжүүлж ирсэн юм. Дээрх хугацаанд аймгийн ИТХ-д давхардсан тоогоор нийт 252 төлөөлөгч сонгогдон ажилласан байдаг. Үе үеийн хурлын төлөөлөгчид та бүхэн тухайн бүрэн эрхийн хугацаандаа аймаг, хотынхоо өмнө тулгамдсан асуудлуудыг шийдвэрлэх, орон нутгийн хөгжлийн бодлого, зорилтуудыг тодорхойлох амаргүй ажилд иргэд сонгогчдоо төлөөлөн оролцож ирсэн түүхтэй. 
       Улс орон даяар тэмдэглэж байгаа Нутгийн удирдлагын байгууллагын үүсэн байгуулагдсаны түүхт 30 жилийн ойг тохиолдуулан аймаг, сумдын Иргэдийн Төлөөлөгчдийн Хуралд иргэд сонгогчдын итгэлийг хүлээн сонгогдож, аймаг орон нутгийн хөгжлийн төлөө үр бүтээлтэй ажиллаж ирсэн үе үеийн хурлын эрхэм хүндэт төлөөлөгчид та бүхэнд аймгийнхаа нийт иргэдийн нэрийн өмнөөс халуун талархал илэрхийлье. 
       Өнөөдөр бид өнгөрсөн хугацаанд олсон ололт амжилтаа дүгнэж, алдсан зүйлээсээ сургамж авч, ирээдүйд чиглэсэн бодлогын асуудлаа ярилцах түүхэн боломж гэж үзэж байна. Манай Орхон аймаг, Эрдэнэт хотын хөгжлийн бодлогын цөм нь Хүний хөгжилд чиглэж байгаа. Бидний үнэт зүйл бол иргэд маань юм. Тийм учраас цаашид иргэдийн амьдрал дундаас орон нутгийн хөгжлийн бодлого томьёологдон гарах учиртай гэж би бодож байна.

      Нутгийн өөрөө удирдах байгууллага болох бүх шатны хурлыг сонгон байгуулахад идэвхтэй оролцож саналаа өгч ирсэн Орхон аймгийнхаа нийт иргэд, Эрдэнэтчүүддээ, сонгогчид та бүхэндээ баяр хүргэж, ажлын амжилт сайн сайхан бүхнийг хүсье. Орхон аймаг, Эрдэнэт хотынхоо хөгжил цэцэглэлт, Эрдэнэтчүүдийнхээ сайн сайхан амьдралын төлөө, Хүний хөгжлийн төлөө хамтран ажиллацгаая. Аймгийн ИТХ-ын хүндэтгэлийн хуралдаанд амжилт хүсье. Орхон аймаг, Эрдэнэт хот маань цэцэглэн хөгжих болтугай.

Орхон аймгийн Засаг дарга Сэмжидийн Батжаргал 
2022.12.14