АНУ-аас Монгол Улсад суугаа Онц бөгөөд бүрэн эрхт Элчин сайд ноён Ричард Буанганыг хүлээн авч уулзлаа
АНУ-аас Монгол Улсад суух Онц бөгөөд Бүрэн эрхт Элчин сайд Ричард Буанган өнөөдөр Орхон аймагт зочиллоо. Аймгийн удирдлагууд ноён Элчин сайд болон Байгаль орчин, шинжлэх ухаан, технологи, эрүүл мэндийн асуудал хариуцсан ажилтан Кэвин Мүүр, Эдийн засгийн хэлтсийн ажилтан П.Дарьсан, Олон нийттэй харилцах алба, Америкийн төвүүдийн захирал Д.Болормаа нарыг хүлээн авч уулзан, хамтын ажиллагааны талаар санал солилцов.
Элчин сайд Ричард Буанганын хувьд өнгөрсөн аравдугаар сард АНУ-аас Монгол Улсад суух Онц бөгөөд Бүрэн эрхт Элчин сайдаар томилогдсон юм. Орхон аймагт хийж буй түүний энэхүү ажлын айлчлал нь Элчин сайдаар томилогдсоноос хойш орон нутагт хийж буй анхны айлчлал. Энэ талаар Ноён Элчин сайд Ричард Буанган “Орон нутагт хийж буй анхны айлчлалаа Орхон аймгаас эхлүүллээ. Орхон аймагт ирж иргэдийн аж амьдрал, хотын хөгжил дэвшлийг биечлэн харж байгаадаа баяртай байна” гэсэн.
Мөн тэрээр, Орхон аймаг,Эрдэнэт хотыг нийгэм, эдийн засгийн өндөр хөгжилтэй, аж үйлдвэр хөгжсөн томоохон хот болохыг онцлов.
Засаг дарга С.Батжаргал уузалтаар хэд хэдэн чиглэлээр хамтран ажиллах хүсэлтэй байгаагаа уламжиллаа. АНУ-ын Соёл, мэдээллийн төвийг байгуулах, сайн дурын ажилтнуудыг орон нутагтаа ирүүлэх, сурагч, оюутан солилцоог Эрдэнэттэй холбон хэрэгжүүлэх хүсэлтэй байгаа илэрхийлэхэд ноён Элчид сайд бүхий л талаар хамтарч, дэмжиж ажиллахаа илэрхийлсэн.
2007 онд тухайн үеийн аймгийн удирдлагууд АНУ-ын Аляска мужийн Фэйрбанкс хоттой эгч дүү хотын харилцаа тогтоох санамж бичгийг үзэглэж байсан юм. Үүний хүрээнд Анкориджийн их сургуульд Орхон аймгийн оюутнууд суралцах, Эрдэнэт үйлдвэрийн инженер техникийн ажилтнууд Аляскийн уул уурхайн үйлдвэрүүдтэй танилцах боломж нээгдсэн юм.
Цаашид энэхүү хамтын ажиллагаагаа сэргээж, өргөжүүлэх хүсэлтэй байгаа Засаг дарга С.Батжаргал хэлэхэд Элчин сайд Ричард Буанган талархан хүлээн авсан.
Элчин сайд Ричард Буанган аймгийн удирдлагуудыг хүлээн авч уулзсанд талархал илэрхийлэн, Эрдэнэт хотын талаар илүү их мэдээлэл авлаа. Энэхүү уулзалтаас Эрдэнэт хоттой хамтын ажиллагааны өргөн боломж, түүнийг дэмжих, чадавхи бийг онцлов. Мөн тэрээр, Орхон аймагт АНУ-ын Соёл, мэдээллийн төв нээгдсэнээр хоёр орны хамтын ажиллагааг улам гүнзгийрүүлж, найрамдал нөхөрлөлийн бодит бэлгэ тэмдэг болно гэж үзэж байна гэлээ.
Мэдээллийн төв
