Төрийн сангийн цахим системийн хэрэглээний талаар сургалт зохион байгуулж байна
Ирэх оны нэг дүгээр сараас эхлэн төрийн сангийн гүйлгээ цахимжиж байгаатай холбоотойгоор аймгийн Санхүү төрийн сангийн хэлтсээс төрийн байгууллагын дарга, нягтлан бодогч нарт цахим системийн хэрэглээний талаар сургалт зохион байгуулж байна.
Сургалт “Төрийн сангийн төлбөр тооцооны цахим системийн хэрэглэгчийн эрхийн тохиргоо, нэхэмжлэх, зарлага, амлалт үүрэг, тайлан модулийг ашиглах нь” сэдвийн хүрээнд хийгдэнэ.
Сангийн яамны зохицуулах зөвлөлийн дарга, төрийн сангийн удирдлагын цахим системийн нэвтрүүлэх багийн ахлагч Ц.Ариунсанаагаар ахлуулсан 4 хүний бүрэлдэнхүүнтэй ажлын хэсэг ирж сургалтыг явуулж, мэдээлэл, зөвлөгөө өгч байгаа ажээ.
Аймгийн хэмжээнд төрийн сангаар гүйлгээ хийдэг 107 байгууллага байдаг бөгөөд сургалтад 102 байгууллагын дарга, нягтлан бодогч нар хамрагдаж байна.
Төрийн сангийн гүйлгээ цахимжсанаар байгууллагын дарга нягтлангууд төлбөр тооцоог биечлэн ирж хийх шаардлагагүй болох бөгөөд байгаа газраасаа цахим системийн тусламжтайгаар гүйлгээ хийх боломжтой болж цаг хугацаа хэмнэх, ажил хөнгөвчлөх зэрэг давуу талтай гэдгийг албаны хүмүүс онцоллоо.
Түүнчлэн сургалтын эхэнд аймгийн Засаг дарга С.Батжаргал үг хэлж, төрийн 34 байгууллагын нягтлан бодогч, санхүүгийн мэргэжилтнүүдэд ажлын хэрэглээнд зориулан зөөврийн болон суурин компьютерийг хүлээлгэн өглөө. Өнгөрсөн жил 50 гаруй нягтлан бодогч болон байгууллагат олгож байжээ. Ингэснээр цахим шилжилт хийгдэж буй салбарт ажиллах нөхцөл боломж сайжирч байгаа юм.
Мэдээллийн төв
