2022 оны хөрөнгө оруулалтаар хийгдэх зарим ажлын материал таталтыг хийж, бэлтгэл ажлыг хангаж байна

Өнгөрсөн долоо хоногийн Засаг даргын шуурхай зөвлөгөөнөөр 2021, 2022 оны хөрөнгө оруулалтын ажлуудыг дуусгах, зарим ажлуудыг эхлүүлэх талаар анхаарч ажиллах үүрэг даалгавар өгсөн. Тухайлбал, цэцэрлэгт хүрээлэнгийн хашаа, Эко хорооллын ус дулаан хуваарилах төв, инженерийн шугам сүлжээ, дэд бүтэц, 11 дүгээр хороолол болон Согоот багийн ус дулаан хуваарилах төв, БОЭТ-ийн гадна тохижилтын ажил зэрэг байгаа юм.

2022 оны хөрөнгө оруулалтаар хийгдэх ажлуудаас эхлээгүй 9 ажил байснаас долоон ажлын материал таталт, бэлтгэл ажлыг хангаж эхэлсэн талаар Хот байгуулалт, барилга захиалагчийн албанаас мэдээллээ. Эхлээгүй хоёр ажлын гүйцэтгэгч компани болох “Рояал Алтай” констракшн ХХК-тай аймгийн ЗДТГ-ын Хөгжлийн бодлого төлөвлөлт, хөрөнгө оруулалтын хэлтэс, Хууль эрх зүйн хэлтэсийн холбогдох мэргэжилтнүүд уулзалт хийсэн.

Тус компанийн 2021 оны он дамжиж хэрэгжиж байгаа хоёр ажил байгаа бөгөөд энэ сарын 20-нд гэрээний хугацаа нь дуусах сантехникийн засварын ажлыг тусгай зөвшөөрлийн сунгалт ирэх хүртэл цуцлахгүй байхаар, энэ сарын 1-нд гэрээний хугацаа дуусгавар болсон Согоот багийн цэвэр усны шугам шинэчлэх ажлын гэрээг цуцлахаар тус тус шийдвэрлэв.

Мэдээллийн төв