Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 60 дугаар зүйлийн 60.1.1, 60.1.10 дахь заалт, 66 дугаар зүйлийн 66.1 дэх хэсэг, Төсвийн тухай хуулийн 14 дүгээр зүйлийн 14.2.3 дахь заалт, 41 дүгээр зүйлийн 41.2.2 дахь заалт, Татварын ерөнхий хуулийн 26 дугаар зүйлийн 26.1, 26.2, 26.3, 26.4 дэх хэсэгт заасныг тус тус үндэслэн ЗАХИРАМЖЛАХ нь:

    1.Аймгийн нутаг дэвсгэрт үйл ажиллагаа эрхэлж буй татвар төлөгч хувь хүн, хуулийн этгээдийн газар зүйн байршилд нь цэг хатган бүртгэлжүүлж, тоолох зорилгоор “Татвар төлөгчийн шинэчилсэн бүртгэл, тооллого”-ыг зохион байгуулсугай.

    2.Шинэчилсэн бүртгэл, тооллогыг аймгийн хэмжээнд зохион байгуулах Ажлын хэсгийн бүрэлдэхүүнийг 1 дүгээр хавсралтаар баталсугай.

   3.Газрын бүртгэл, ногдлын мэдээллийн зөрүүг арилгах, шүүхийн маргааныг эцэслэн шийдвэрлүүлэх, газрын үл хөдлөх хөрөнгийн ногдлыг үүсгэх, тулгалт хийх, хуримтлагдсан газрын төлбөрийг барагдуулахыг Газрын харилцаа, барилга, хот байгуулалтын газар (Р.Галбаатар)-т, өмчилсөн газрын татварын ногдлыг холбогдох мэдээллийн санд үүсгэхийг Татварын газар (Б.Цэвээнсүрэн)-т, үйл ажиллагаа эрхлэгчдийн бүртгэл болон тусгай зөвшөөрлийн талаарх мэдээллийг тулган баталгаажуулахыг Бүс, орон нутгийн хөрөнгө оруулалт, бодлого, төлөвлөлтийн хэлтэс (Ж.Бат-Өлзий)-т, иргэн, хуулийн этгээд, үл хөдлөх хөрөнгийн бүртгэл, мэдээллийг тулган мэдээлэл солилцон ажиллахыг Улсын бүртгэлийн газар (М.Отгонбаяр)-т тус тус үүрэг болгосугай.

   4.Татвар төлөгчийн бүртгэл, тооллого, хяналтыг зохион байгуулахад шаардагдах зардлыг 2 дугаар  хавсралтаар  баталж, 6,000,000 (зургаан сая)  төгрөгийг төсөл хөтөлбөрийн “Татварын хуулийг иргэд,  олон  нийтэд  сурталчлах,  хэрэгжилтийг зохион     байгуулах”     зардлаас     гаргахыг     Санхүү,     төрийн      сангийн      хэлтэс 
 (Л.Галсансайнхувьт)-т зөвшөөрсүгэй.

   5.Энэхүү захирамжид заасан ажлыг зохион байгуулах удирдамж, төлөвлөгөө гарган хэрэгжилтэд хяналт тавихыг аймгийн Засаг даргын Тамгын газрын дарга Б.Ганзоригт, тус ажилд дэмжлэг үзүүлж ажиллахыг аймаг, сумын нутгийн захиргааны байгууллагын дарга нарт тус тус үүрэг болгосугай.

ЗАСАГ ДАРГА                                     Б.ЗОРИГТБАЯР