Нийгмийн даатгалын газар

Цагийн хуваарь

Сайн дурын даатгал

Шийдвэрлэх хугацаа хэлбэр

САЙН ДУРЫН ДААТГАЛД ХЭН ДААТГУУЛАХ ВЭ?

- Хувиараа хөдөлмөр эрхлэгч
- Малчин, туслах малчин
- Оюутан суралцагч
- Хөдөлмөрийн чадвараа алдсан хүн
- Цалингүй нэг ба түүнээс дээш сарын хугацаагаар захиргааны чөлөө авсан ажилтан
- Гурав хүртэлх насны хүүхдээ асарч буй эх
- Хөгжлийн бэрхшээлтэй хүүхдээ асарч байгаа ажил хөдөлмөр эрхлээгүй эх/эцэг
- Төрөөс олгох урамшуулалд хамрагдсан иргэн
- Гадаад улсад ажиллаж, амьдарч байгаа Монгол Улсын иргэн
- Монгол улсад амьдарч байгаа гадаадын иргэн, харьяалалгүй хүн

ТА САЙН ДУРЫН ДААТГАЛД ШИНЭЭР ДААТГУУЛАХДАА:

Нийгмийн даатгалд сайн дураар даатгуулах иргэн нийгмийн даатгалын байгууллагад биечлэн ирэх болон “Нийгмийн даатгал” аппликейшн, "portal.ndaatgal.mn"даатгуулагчид зориулсан вэб хуудсаар “Нийгмийн даатгалд сайн дураар даатгуулсан тухай” гэрээ байгуулах бөгөөд гэрээнд шимтгэл тооцох сарын цалин хөлс, орлогын хэмжээ, шимтгэл төлөх хугацаагаа тодорхой тусгана. Гэрээний хугацаанд цалин хөлс, орлогын хэмжээ болон хугацааг өөрчлөх боломжгүй.
Шимтгэл тооцох сарын цалин хөлс, орлогын доод хэмжээ нь Хөдөлмөр, нийгмийн зөвшлийн гурван талт үндэсний хорооноос тогтоосон тухайн үед мөрдөж байгаа хөдөлмөрийн хөлсний доод хэмжээ (2026 онд 792 000 төгрөг)-нээс багагүй байна.
Шимтгэл тооцох сарын орлогын дээд хэмжээ тухайн үед мөрдөж байгаа хөдөлмөрийн хөлсний доод хэмжээг 7 дахин нэмэгдүүлсэнтэй тэнцүү (2026 онд 5 544 000 төгрөг) байна.

0-3 НАСНЫ ХҮҮХДЭЭ АСАРЧ БАЙГАА ЭЭЖИЙН САЙН ДУРЫН ДААТГАЛ

Сайн дураар даатгуулагч эхийн төлөх шимтгэлээс тэтгэмжийн даатгалын сан болон улсын төсвөөс хөдөлмөрийн хөлсний доод хэмжээ (792 000 төгрөг)-ний 12.5 хувьд ногдох хэсгийн 50.0 хувь (49 500 төгрөг)-ийг хасаж зөрүү шимтгэлийг даатгуулагч өөрөө хариуцан төлнө.
Жишээ нь: Даатгуулагчийн сард төлөх шимтгэл 792 000*13.5% = 106 920 төгрөг

Үүнээс – 57 420 төгрөг (Даатгуулагч эх өөрөө төлнө)

– 49 500 төгрөг (Тэтгэмжийн даатгалын сангаас болон улсын төсвөөс хариуцан төлнө)

МАЛЧИН, ТУСЛАХ МАЛЧНЫ САЙН ДУРЫН ДААТГАЛ

Малчин, туслах малчны төлөх шимтгэлээс улсын төсвөөс хөдөлмөрийн хөлсний доод хэмжээ (792 000 төгрөг)-ний тэтгэврийн даатгалын шимтгэлийн 50% (5.75 хувь болох 45 540 төгрөг)-ийг хасаж зөрүү шимтгэлийг даатгуулагч өөрөө хариуцан төлнө.
Малчин, туслах малчны сайн дурын даатгалын гэрээ байгуулах даатгуулагч нь гэрээ байгуулахын өмнөх жилийн Мал, тэжээвэр амьтад, малын хашаа, худгийн тооллогын маягт буюу “мал тооллогын “А” данс”, малчин өрхийн гишүүн бол малчин өрхийн бүртгэлд малчнаар бүртгэгдсэн баримт бичиг, “мал тооллогын “А” данс”, туслах малчин бол малчинтай байгуулсан хөдөлмөрийн гэрээ болон малчны “мал тооллогын “А” данс”-ыг гэрээнд хавсаргана.
Жишээ нь: Даатгуулагчийн сард төлөх шимтгэл 792 000*13.5% = 106 920 төгрөг

Үүнээс – 61 380 төгрөг (Даатгуулагч өөрөө төлнө)

– 45 540 төгрөг (Улсын төсвөөс хариуцан төлнө)

ХӨГЖЛИЙН БЭРХШЭЭЛТЭЙ ХҮҮХДЭЭ АСАРЧ БАЙГАА ЭХ/ЭЦЭГ/-ийн САЙН ДУРЫН ДААТГАЛ

18 нас хүртэлх хөгжлийн бэрхшээлтэй хүүхдээ асарч байгаа ажил хөдөлмөр эрхлээгүй эх (эцэг)-ийн төлөх шимтгэлээс улсын төсвөөс хөдөлмөрийн хөлсний доод хэмжээ (792 000 төгрөг)-ний тэтгэврийн даатгалын шимтгэлийн 11.5% (91 080 төгрөг)-ийг хасаж зөрүү шимтгэлийг даатгуулагч өөрөө хариуцан төлнө.
Хөгжлийн бэрхшээлтэй хүүхдээ асарч байгаа ажил хөдөлмөр эрхлээгүй эх /эцэг/-ийн сайн дурын даатгалын гэрээ байгуулах даатгуулагч нь даатгуулагчийн хүүхдийн төрсний гэрчилгээ, байнгын асаргаа шаардлагатай хөгжлийн бэрхшээлтэй хүүхдийн тодорхойлолтын мэдээлэлд үндэслэн гэрээ байгуулна.
Жишээ нь: Даатгуулагчийн сард төлөх шимтгэл 792 000*13.5% = 106 920 төгрөг

Үүнээс – 15 840 төгрөг (Даатгуулагч өөрөө төлнө)

– 91 080 төгрөг (Улсын төсвөөс хариуцан төлнө)

Үйлчилгээг авахад анхаарах зүйлс

САЙН ДУРААР ДААТГУУЛАГЧИЙН ХҮЛЭЭХ ХАРИУЦЛАГА:

Сайн дураар даатгуулагч нь сард төлбөл зохих шимтгэлээ нийгмийн даатгалын байгууллагатай байгуулсан гэрээнд заасан хугацаанд төлөөгүй тохиолдолд дутуу төлөгдсөн буюу хугацаандаа төлөгдөөгүй шимтгэлийн дүнгээс хугацаа хэтрүүлсэн хоног тутамд 0.3 хувиар тооцож алданги төлнө. Энэхүү алдангийн хэмжээ нь төлбөл зохих шимтгэлийн 50 хувиас хэтрэхгүй байна.

САЙН ДУРЫН ДААТГАЛЫН ГЭРЭЭ ДУУСГАВАР БОЛОХ:

Дараах тохиолдолд нийгмийн даатгалын байгууллагатай байгуулсан гэрээ дуусгавар болно.

Гэрээгээр тохирсон хугацаа дуусгавар болсон;
Өндөр насны тэтгэвэр тогтоолгосон сараас;
Даатгуулагч гэрээний хугацааг дуустал хугацаагаар хөдөлмөрийн гэрээгээр ажил хөдөлмөр эрхэлсэн бол тухайн сараас;
Даатгуулагч нас барсан сараас.

Үйлчилгээг үзүүлэх мэргэжилтний мэдээлэл