Төрийн байгууллагын ажилтан, албан хаагчид нийгмийн хариуцлагын хүрээнд Хог хаягдлын нэгдсэн цэг дээр ажиллаж байна

Говил багийн Хог хаягдлын нэгдсэн цэг орчмын газар нутагт тархсан хог хаягдлыг хумих, дарж булшлах ажлыг Засаг даргын захирамжаар төр хувийн, хэвшил, иргэдийн оролцоотой гүйцэтгэж эхэлсэн. Өнөөдөр аймгийн ИТХ-ын ажлын алба, ЗДТГ, Газрын харилцаа хот байгуулалтын газар, МХГ, Баян-Өндөр сумын ЗДТГ зэрэг 7 байгууллагын 250 гаруй ажилтан албан хаагчид Хог хаягдлын нэгдсэн цэг дээр ажиллаж, 15 га орчим талбайд тархсан хог хаягдлыг түүж цэвэрлэлээ.

Хог хаягдлын нэгдсэн цэгийн 80,3 га талбайн хэмжээ хүний буруутай үйл ажиллагаа, байгаль цаг уурын нөхцөл байдал зэргээс шалтгаалж өдгөө 180 га талбайг хамраад байгаа юм. Тиймээс эхний ээлжинд хогийн цэг орчмын газар нутгийн 35 га талбайн хог хаягдлыг хумих ажлыг өнгөрсөн долоо хоногоос эхлүүлсэн. Өнгөрсөн сарын 23-28-ны өдрүүдэд Хот тохижуулах газар 3 ковш, 5 машин, “Ачит-Ихт” ХХК 2 хово, 1 трактор техник хэрэгслээр 3га талбайд 4968м.куб хог хаягдлыг өнөөдрийн байддлаар хумьж дарж устгаад байна.

БОАЖ, Агаар, орчны бохирдлыг бууруулах үндэсний хорооноос Хог хаягдлын нэгдсэн цэг орчмын газрын хөрсний доройтлыг зогсоох, хог хаягдлын тархалтыг хумих, дарж устгах, хамгаалалтын далан байгуулах, хөрсний нөхөн сэргээлтийг хийхэд зориулж нэг тэрбум төгрөгийг санхүүжилтийг шийдвэрлэсэн. Уг эх үүсвэрээр 35 га талбайн хогийг хумих бөгөөд 3 га талбайд мод үржүүлэг, ойжуулалтын ажлыг хийж гүйцэтгэх юм.

Хуваарийн дагуу маргааш Байгаль орчин аялал жуулчлалын газар, Татварын хэлтэс, Цагдаагийн газар зэрэг 7 байгууллагын 100 гаруй ажилтан албан хаагчид Хог хаягдлын нэгдсэн цэг дээр ажиллана. Мөн энэ үеэр Хот тохижуулах газраас Хог хаягдлын нэгдсэн цэг дээр ажиллаж буй төрийн байгууллагын ажилтан албан хаагчдад хог хаягдлын талаарх мэдээлэл, сургалт, сурталчилгааг хийж байна.

Мэдээллийн төв