Та бүхэндээ Анхдугаар үндсэн хуулиа баталж, Хүн төрөлхтний сонорт эрх зүйт төрт ёсны тусгаар Монгол улсаа тунхаглан зарласан түүхт өдрийн мэндийг чин сэтгэлээсээ өргөн дэвшүүлье.

    Эдүгээгээс 96 жилийн тэртээ гадаад дотоодын дарлал, хаант засаглал, хамжлагат ёсноос салсан Монголчуудын, чин зоригт, холч мэргэн өвөг дээдсийн тунхаглан зарласан тусгаар тогтнолыг “Усан дээр ассан гал” буюу байж боломгүй үзэгдэл хэмээн дэлхийн орнууд, түүхчид дүгнэсэн байдаг. 

    Улс гэрээ тунхагласан энэ өдөр бол эх оронч өвөг дээдсийн хатан зориг, олон цэрэг эрсийн халуун амь, Монголчууд биднийг сорьсон цадиг түүхийн өмнө бүтэн үлдсэн улс үндэсний дархлааны түүхт өдөр билээ. 

Дэлхий дахинаа тархаад буй COVID-19 цар тахал эх оронд маань төдийгүй Орхон аймагт маань ч нүүрлээд байна. Хүн бүхэн хариуцлагатай байж, халдвар хамгааллын дэглэмээ нарийн чанд баримтлан тэвчээртэй байж чадвал бид энэхүү нөхцөл байдлыг хурдан туулан гарах бололцоотой. 

     Хүнд хэцүү энэ цаг үеийг бид бүхэн эв нэгдлийг эрхэмлэн дээдэлж, улс гэрийнхээ хөгжил дэвшил ирээдүйн төлөө итгэл төгс хамтдаа хичээн зүтгэцгээе.