Үүний дараа буюу 4-р сарын 11-ний өдөр аймгийн Засаг даргын орлогч С.Батжаргал Европын сэргээн босголт хөгжлийн банкны Монгол дахь Суурин төлөөлөгч Ирина Кравченког хүлээн авч уулзсан бөгөөд энэхүү уулзалтын үеэр “Эрдэнэт хот байгуулагдсан цагаасаа хойш 40 гаруй жил болоход инженерийн шугам сүлжээ хуучирч муудсан дорвитой шинэчлэлт хийгдэж байгаагүй, цаашид хотын хүн ам өргөжин тэлэхийн хэрээр инженерийн шугам сүлжээг захын хорооллууд руу тэлэх шаардлагатай байгаа” талаар ярилцаж, цаашид энэ чиглэлээр хамтран ажиллах хүсэлтээ илэрхийлсэн юм. 

  Европын сэргээн босголт хөгжлийн банк нь 2006 оноос манай улсад үйл ажиллагаа явуулж эхэлсэн бөгөөд энэ хугацаанд нийтдээ 1.5 тэрбум ам долларын хөрөнгө оруулалт хийсэн аж. Тус банк нь дэлхийн 38 улсад үйл ажиллагаа явуулдаг. Тус банк нь хөрөнгө оруулалт, зөвлөн туслах үйлчилгээ, тоног төхөөрөмжийн туслалцааны  чиглэлээр үйл ажиллагаа явуулдаг. 

Ингээд Европын сэргээн босголт хөгжлийн банкны буцалтгүй тусламж, хөнгөлөлттэй зээл гэх мэт эх үүсвэрийн санхүүжилтээр Эрдэнэт хотын үерийн далангийн асуудлыг иж бүрнээр шийдвэрлэх асуудал ажил хэрэг болж эхэлсэн юм. 

Сүүлийн 5 жилд манай хотод нийт 9 удаагийн үер усны гамшиг тохиолдсоны улмаас 7 хүний амь нас эрсдэж, иргэн, ААНБ-уудад олон сая төгрөгийн хохирол учирсан.

Орхон аймагт хаврын улиралд шар усны, зуны улиралд  бороо хурын үер болж их хэмжээний хохирол учирч байгаа нь Хотын үерийн нэгдсэн далан баригдаагүйтэй холбоотой гэж мэргэжлийн байгууллагууд үздэг. 2015 онд Орон нутгийн төсвийн 22.3 тэрбум төгрөгийн хөрөнгөөр “Хотын үерийн хамгаалалтын далан суваг”-ийн ажлын зургийг боловсруулсан ч хөрөнгийн эх үүсвэр шийдэгдээгүй шалтгаанаар өнөөдрийг хүртэл барьж чадаагүй байна. Эрдэнэт хотын хэмжээнд нийт 44.6 км үерийн хамгаалалтын далан хийхэд 22.3 тэрбум төгрөгийн хөрөнгө шаардлагатай. 

        Энэхүү асуудлаар Эрдэнэт хотын уур амьсгалын өөрчлөлтийн нөлөөллийг бууруулах, үерийн далан барих, инженерийн шугам сүлжээг тэлэх төслийн техник эдийн засгийн үндэслэл боловсруулах төслийн гарааны уулзалт өнөөдөр Орхон аймгийн ЗДТГ-ын Ажлын танхимд боллоо. Дээрхи төслийн зөвлөх болон судалгааны ажлыг гүйцэтгэх SWECO группийн зөвлөх багийнхантай Орхон аймгийн Засаг даргын орлогч А.Түвшинжаргалаар ахлуулсан холбогдох байгууллагын удирдлагууд уулзлаа. Дани улсад төвтэй “Свэко” групп нь олон улын зөвлөх үйлчилгээ үзүүлдэг бөгөөд нийт 15000 орчим ажилтантай, харин Монголын талаас ажиллаж буй “Монконсалт” ХХК нь 56 байнгын ажилтантай бөгөөд ихэвчлэн инженер техникийн ажилтан мэргэжилтнүүд байдаг. Мөн санхүү, эдийн засаг нийгмийн талаас нь судалгаа хийх “БДО” ХХК нь 200 орчим мэргэжилтэнтэй аудит, зөвлөх үйлчилгээ үзүүлдэг фирм юм. Дээрхи гурван компани хамтран энэхүү төсөлд нэг баг болж ажиллах бөгөөд Нийгмийн нөлөөлөл, техникийн үнэлгээ, зохион байгуулалт, уур амьсгалын өөрчлөлтийн үнэлгээ хийхээс гадна санхүүгийн шинжилгээ хийх юм. 

       Энэхүү судалгааны багийн ажлын үр дүнгээр Техник эдийн засгийн үнэлгээ боловсруулагдан Эрдэнэт хотын уур амьсгалын өөрчлөлтийн нөлөөллийг бууруулах, үерийн далан барих, инженерийн шугам сүлжээг тэлэх төслийг Европын сэргээн босголт хөгжлийн банкны санхүүжилт хийгдэх боломжтой болно.