Орхон аймгийн Засаг даргын 7 хоног бүрийн шуурхай зөвлөлгөөн өнөөдөр хуралдлаа. Энэ удаагийн хуралдаанаар хүнд даацын автомашинууд хотын зарим хэсгийн замаар зорчсоны улмаас зам их хэмжээгээр эвдэрч байгаа тухай яригдлаа. Ялангуяа вокзалын чиглэлийн авто замд маш их эвдрэл гарч байгаа аж. Иймээс удахгүй хотын төвийн зарим чиглэлийн автозамуудаар хүнд даацын автомашины хөдөлгөөнийг хязгаарлах, цагийн болон жингийн хязгаарлалт тогтоох, зайлшгүй зорчиж ачаа тээвэрлэх үед зөвшөөрөл олгодог болох зэрэг асуудлыг судлаж ажил хэрэг болгохыг үүрэг болголоо. “ЭДЦС” ТӨХК-ийн 2 дугаар үнсэн санг суллаж байгаатай холбогдуулан хүнд даацын HOWO маркийн өөрөө буулгагч тээврийн хэрэгсэлүүд олноор ажиллаж байгаа. Иймээс автомашины ачааг 25 тонноос илүүгүй ачиж, тээвэрлэж эхэлжээ.
Урин дулааны улирал эхлэхтэй зэрэгцэн малчид хотын төв, ногоон бүсэд шахаж буудаг. Үүний улмаас хариулгагүй мал хотын төвд олноор орж ирэх, хотын ногоон байгууламжийг эвдэж сүйтгэх, олон нийтийн эдэлбэр газар, зам талбайг бохирдуулах, авто тээврийн хөдөлгөөнд саад учруулах гэх мэт хүндрэлтэй асуудал тулгардаг тул энэ асуудлыг одооноос малчдад сануулж, хязгаарлалтын бүс тогтоон хотын төвөөс тодорхой алслагдмал зайнд буулгахыг Баян-Өндөр сумын Засаг даргын орлогч Ц.Одгэрэлд даалгалаа.
Энэ зун манай орны хувьд олон жилийн дундажаас ахиу хур тунадас орох төлөвтэй байгаа бөгөөд иргэд, аж ахуйн нэгж, байгууллагууд эртнээс үер усны гамшигаас урьдчилан сэргийлэх, гуу, жалга, үерийн ам газарт буухгүй байхыг мөн мэргэжлийн байгууллагуудаас сануулав.
Орхон аймагт шинэ технологи нутагшуулж, инновацийг төлөвшүүлж, ажлын байр бий болгох зорилгоор Засаг дарга Д.Батлутын санаачилгаар “Эрдэнэт шинжлэх ухаан технологийн парк”-ыг байгуулснаас хойш даруй 1 жилийн хугацаа өнгөрөөд байна. Энэ хооронд эрдэмтэдийн баг гагнуурын электродын үйлдвэрийг байгуулсан бөгөөд “Эрдэнэт үйлдвэр” ХХК-ийн нэг жилийн гангийн гагнуурын хэрэгцээг бүрэн хангах хэмжээний электродыг нийлүүлэхээр болжээ. Мөн “Оюу толгой” ХХК-тай хамтран ажиллахаар болсон бөгөөд удахгүй “Оюу толгой” ХХК-ийн төлөөлөл Эрдэнэт хотод хүрэлцэн ирж “Эрдэнэт-шинжлэх ухаан технологийн парк”-ийн үйл ажиллагаатай танилцан хамтын ажиллагааныхаа талаар ярилцах юм.
Орхон аймгийн Засаг дарга Д.Батлутын зүгээс холбогдох чиглэлийн байгууллагууд “Эрдэнэт үйлдвэр” ХХК-ийн хаягдлын далангийн цагаан тоосны талаар арга хэмжээ авч ажиллах 7 хоног бүр мэдээллэж байх үүрэг өглөө.
Мэдээллийн төв
.png)
Сэтгэгдэл