Баяр наадмын комиссын даргаар Засаг даргын орлогч А.Түвшинжаргал, нарийн бичгийн даргаар Цэргийн штабын дарга, хурандаа Г.Батсуурь нар томилогдон ажиллаж байна. Орхон аймгийн Засаг даргын орлогч А.Түвшинжаргал, ЗДТГ-ын дарга Д.Соёлчхүү, ЗДТГ-ын Хөрөнгө оруулалт, хөгжлийн бодлого төлөвлөлтийн хэлтсийн дарга Ц.Баяржаргал, Хотын захирагчийн албаны дарга М.Түмэнжаргал нарын тэргүүтэй албаны хүмүүс өчигдөр цэнгэлдэх хүрээлэнд очиж наадмын бэлтгэл ажлын явцтай танилцлаа.

Биеийн тамир спортын газрын дарга Н.Зулбаатарын мэдээлснээр баяр наадмын бэлтгэл ажил 80 орчим хувьтай явж байна. 

Цэнгэлдэх хүрээлэнгийн засварын ажил хийгдэж дуусах шатандаа орсон бөгөөд наадмын үеэр павильон, гэрт хоолоор үйлчлэх иргэдийн газ ашиглалтад аюулгүй байдлыг ч мөн чанд хянаж ажиллах аж. 

“Орхон АЗЗА” ТӨХК-ийн зүгээс авто замыг нь засварлаж байна. 

Өмнөх жилүүдэд зөвхөн дарга нарт үйлчлэх зориулалттай байсан 00-ийг энэ жилээс баяр наадмын үеэр жирэмсэн болон хүүхэдтэй ээжүүд, хөгжлийн бэрхшээлтэй иргэдэд зориулсан тусгай 00 ажиллуулах талаар газар дээр нь шийдвэрлэлээ. Ингэснээр нялх хүүхэдтэй ээжүүд тэнд орж хүүхдээ хуурайлах, живхийг нь солих цэвэр, тохилог орчин бүрдүүлж байгаа юм. Баяр наадмын комиссын зүгээс иргэдээ эрүүл, аюулгүй, тохь тухтай, цэвэр орчинд наадамлуулахаар ажиллаж байна. 

Ийнхүү цэнгэлдэх хүрээлэн наадамчидаа хүлээн авахад бэлэн болж байна.