Орхон аймгийн нийт газар нутгийн 46,3 мянган га нь хөдөө аж ахуйн эдэлбэр газар. Үүнээс 5062,17 га-г тариалангийн талбай, 39497,46 га-г бэлчээрийн талбай эзэлдэг. 2016 онд аймгийн хэмжээнд 2 сумын 21 аж ахуйн нэгж, байгууллага 600 гаруй айл өрх газар тариалангийн үйлдвэрлэл эрхэлж 4401,5 га талбайд тариалалт хийжээ. Орхон аймгийн Засаг даргын 2016-2020 оны үйл ажиллагааны хөтөлбөр, төлөвлөгөөний хүрээнд хэрэгжүүлэх 18 дэд хөтөлбөрийн нэг нь “Өрхийн тариалалтыг дэмжих дэд хөтөлбөр” юм. Энэ талаар Орхон аймгийн ЗДТГ-ын Хөрөнгө оруулалт, хөгжлийн бодлого төлөвлөлтийн хэлтсийн ХХАА хариуцсан мэргэжилтэн Ө.Нурбектэй ярилцлаа.
- Өрхийн тариалалтыг дэмжих дэд хөтөлбөрийг хэрэгжүүлэх шаардлага, үндэслэлийн талаар тодруулна уу?
- Орхон аймгийн иргэдээ дотоодын төмс хүнсний ногоогоор хангах, гэр хорооллын иргэдийг хашаандаа төмс хүнсний ногоо тариалж сургах, сайн сортын төмс хүнсний ногооны үр үржүүлэхэд дэмжлэг үзүүлэх, төмс хүнсний ногоо эрхэлдэг иргэдийн техник, технологийг шинэчлэх зайлшгүй шаардлага тулгарч байгаа юм.
- Хөтөлбөрийн гол зорилго юу вэ?
- Төмс, хүнсний ногоо тариалагчдыг дэмжих, хамгаалагдсан хөрсний тариаланг эрхлэх замаар өрхийн орлогыг нэмэгдүүлэх, тариаланг механикжуулах, ажилгүйдэл ядуурлыг бууруулах, аймгийг төмс хүнсний ногоогоор жигд тогтвортой хангахад чиглэгдэж байна. Хөтөлбөрийн хүрээнд 3 зорилт дэвшүүлсэн. Гурван зорилтын хүрээнд 14 үйл ажиллагааг хэрэгжүүлнэ.
- Хэрэгжих хугацааны хувьд..?
- “Өрхийн тариалалтыг дэмжих дэд хөтөлбөр” 2017 оны 4 дүгээр сарын 28-ны өдөр аймгийн ИТХ-ын тэргүүлэгчдийн хуралдааны 52 дугаар тогтоолоор батлагдсан.
2017-2020 онд хэрэгжих юм. Жил бүр хийгдэх ажлын нарийвчилсан төлөвлөгөө гараад хэрэгжинэ. Манай аймгийн 2 сумын 1000 өрх энэ хөтөлбөрт хамрагдсан. Эдгээр 1000 өрхийг бүлгийн зохион байгуулалтад оруулсан. Тус хөтөлбөрийг хэрэгжүүлэхэд шаардлагатай 105 сая төгрөгийг энэ онд батлуулсан. Хүлэмж худалдан авах, төмс, хүнсний ногооны үрээр хангах ажил зохион байгуулаад байна.
- Хүрэх үр дүнгийн талаар тодруулна уу?
- Хөтөлбөрийн нэгдүгээр үе шат нь 2017-2018 онд хэрэгжих юм. Үүнд, техникээр үйлчлэх дундын төв байгуулах, хөнгөлөлттэй нөхцөлөөр хүлэмж олгох, ногооны агуулах, зоорийн багтаамж нэмэгдүүлэх зэрэг ажлууд төлөвлөгдсөн байна.
Хоёрдугаар үе шат нь 2019-2020 онд хэрэгжих бөгөөд хүнсний ногооны хангамж одоогийн түвшнээс 20-30 хувиар нэмэгдэн, төмс хүнсний ногооны үйлдвэрлэлд техникийн шинэчлэл хийх юм. Мөн төмсний үрийг сайн чанарын сортоор шинэчлэх зорилго тавиад байна.
- Бүлгийн зохион байгуулалтад оруулсны давуу тал юу вэ?
- Энэ хөтөлбөрийг хариуцсан нэг хүнийг ажиллуулж байна. Ингэснээр иргэдэд талбайн болон, кабинетийн сургалтыг тогтмол зохион байгуулж байна. Хөтөлбөрийг Хүнс, хөдөө аж ахуйн газар Баян-Өндөр, Жаргалант сумдтай хамтран хэрэгжүүлнэ.
Мэдээллийн төв
.jpg)
.png)
.jpg)
.jpg)
Сэтгэгдэл