А.ТҮВШИНЖАРГАЛ: “ЭРДЭНЭТЧҮҮД ЭРДЭНЭТЧҮҮДДЭЭ ХАЙРТАЙ” ДЭД ХӨТӨЛБӨРИЙН ХҮРЭЭНД 2000 ГАРУЙ ИРГЭНИЙГ АЖЛЫН БАЙРТАЙ БОЛГОНО

Аймгийн Засаг дарга Д.Батлутын 2016-2020 оны үйл ажиллагааны хөтөлбөр төлөвлөгөөнд 18 дэд хөтөлбөр батлан хэрэгжүүлэх талаар туссан. Эдгээр хөтөлбөрүүдийн дийлэнх нь батлагдаж, хэрэгжиж эхлээд байна. Үүнээс иргэдийг ажилтай орлоготой болгоход чиглэсэн  “Эрдэнэтчүүд Эрдэнэтчүүддээ хайртай” дэд хөтөлбөрийг боловсруулах ажлын хэсгийн даргаар ажилласан Засаг даргын орлогч А.Түвшинжаргалтай ярилцлаа.  

- АИТХ-аас баталсан хөтөлбөрүүдийн дундаас нэрнээсээ эхлээд иргэдийн сонирхлыг хамгийн их татаж буй нь “Эрдэнэтчүүд Эрдэнэтчүүддээ хайртай” дэд хөтөлбөр байна. Энэ хөтөлбөр яг хэнд чиглэсэн бэ? 

- Бид аймгийн Засаг даргын үйл ажиллагааны хөтөлбөрт ямар үйл ажиллагааг тусгах хэрэгтэй талаар иргэдээсээ санал асуулга авсан. Дийлэнх нь иргэдийг ажилтай, орлоготой болгох бодлого хэрэгжүүлэх хэрэгтэй гэж үзэж байгаа нь санал асуулгын дүнд харагдсан юм. Тиймээс бид 14 хүний бүрэлдэхүүнтэй баг байгуулж судалгаа хийж хийж, хөтөлбөр боловсруулах ажлыг гүйцэтгэсэн. Орхон аймаг нийт 28 мянга гаруй өрхтэй. Эдгээрээс өрхийн нэг ч гишүүн нь хөдөлмөр эрхэлдэггүй 2800 гаруй айл байгааг судалгаагаар тогтоосон. Тиймээс эдгээр  2800 гаруй өрх болон ажлын байр хэрэгтэй байгаа бусад иргэн, өрхөд зориулж “Эрдэнэтчүүд Эрдэнэтчүүддээ хайртай” дэд хөтөлбөрийг боловсруулж баталлаа. Хөтөлбөрийн үндсэн зорилго бол иргэдийг ажлын байртай болгох, ажилд зуучлах, мэргэжилтэй болгох. Үүний хүрээнд төсвийн хөрөнгөөр хийгдэх бүтээн байгуулалтын ажлыг гүйцэтгэх компаниудыг ажиллах хүчээ орон нутагт бүртгэлтэй ажилгүй иргэдээс бүрдүүлэх шаардлага тавих зэрэг ажлуудыг 5 зорилтын хүрээнд хэрэгжүүлнэ. 
 
- Хөтөлбөрийг ямар хугацаанд хэрэгжүүлж, хэдий хэмжээний төсөв зарцуулах вэ? 
 
- Яг өнөөдрийн байдлаар АИТХ-ын хурлын хуралдаанаар 100 сая төгрөг баталчихаад байна. Энэ нь хангалттай төсөв биш. Тиймээс нэмж мөнгө батлахаар ярилцаж байна. “Эрдэнэтчүүд Эрдэнэтчүүддээ хайртай” дэд хөтөлбөр нь дунд хугацааны хөтөлбөр. 2017-2018 он, 2019-2020 он гээд хоёр үе шатаар хэрэгжих юм.

- “Эрдэнэтчүүд Эрдэнэтчүүддээ хайртай” дэд хөтөлбөрийн хүрээнд олон ажил хийнэ гэж төлөвлөсөн байна. Их ч мөнгө зарцуулах дүр зураг харагдлаа. Хэрэгжүүлэгч нь хэн байх вэ? 
 
- Хэрэгжүүлэх үйл ажиллагааг АЗДТГ-ын Нийгмийн бодлогын хэлтсийн даргаар ахлуулсан ажлын хэсгээс зохион байгуулна. Энэ ажлын хэсэг хөдөлмөрийн насны ажилгүй иргэдийн судалгааг гаргаж цахим мэдээллийн сан бүрдүүлэх, өрхөөр үйлдвэрлэл эрхэлж, өөртөө ажлын байр бий болгож байгаа иргэдэд санхүүгийн болон тоног төхөөрөмжийн дэмжлэг үзүүлэх гээд олон талт үйл ажиллагааг зохион байгуулж, удирдлагаар хангах юм. Нэмж хэлэхэд энэхүү хөтөлбөрт Орхон аймгийн иргэдээс “Эрдэнэт үйлдвэр” ХХК-д ажлын байраар хангах талаар туссан. Үүнийг бид хот, үйлдвэрийн хамтын ажиллагааны хүрээнд шийднэ. 

- Хөтөлбөрийн үр дүнг хэрхэн тооцож байгаа вэ? 
 
- Хөтөлбөрийн үр дүнд дээр дурдсан 2800 гаруй өрхийн хөдөлмөрийн насны иргэдийг мэргэжилтэй, ажилтай болгосон байна. Мөн өрхийн үйлдвэрлэл эрхлэгчдийг хэрхэн дэмжсэн бэ зэрэг үзүүлэлтээр үр дүн харагдана. Өөрөөр хэлбэл Орхон аймагт “Эрдэнэтчүүд Эрдэнэтчүүддээ хайртай” дэд хөтөлбөр хэрэгжсэнээр ажилтай, орлоготой, бүтээлч иргэн, өрхийн тоо нэмэгдэнэ. 
 
- Ажил, хөдөлмөр эрхлэх гэдэг бол тухайн хүний хүсэл сонирхлоос их шалтгаалдаг зүйл. Тэгэхээр хамрагдах хүмүүсийнхээ хандлагыг өөрчлөх талаар хөтөлбөр заалт тусгасан уу?  
 
- Ажлын байр бий болгохоос өмнө мэргэжилтэй ажилтан бэлтгэхэд нилээд сайн анхаармаар юм байна. Манай аймагт ХАА-МСҮТ, Орхон-МСҮТ үйл ажиллагаа явуулж байна. Мэргэжилтэй боловсон хүчин бэлтгэх бололцоо өндөр бий. Бид ч хөтөлбөр боловсруулах явцдаа дээрх байгууллагуудын удирдлагуудтай санал солилцож ойлголцолд хүрсэн. Ингээд иргэдийгээ мэргэжилтэй болгочихвол ажилд зуучлах үйл явц илүү хялбар болно. Хамгийн гол нь иргэд маань “Эрдэнэтчүүд Эрдэнэтчүүддээ хайртай” дэд хөтөлбөрийн хүрээнд ажилд ороод тогтвор суурьшилтай, хариуцлагатай  байх хэрэгтэй. 

- “Эрдэнэтчүүд Эрдэнэтчүүддээ хайртай” хөтөлбөр Засаг дарга Д.Батлутын баримталж буй Хүний хөгжлийн үзэл санаатай хэрхэн уялдаж байгаа вэ? 
 
- Орхон аймгийн Засаг даргын 2016-2020 онд хэрэгжүүлэх үйл ажиллагааны хөтөлбөр, төлөвлөгөөнд 18 дэд хөтөлбөр хэрэгжүүлэх талаар туссан. Эдгээрээс хамгийн том “хүлээлт”-тэй байгаа нь “Эрдэнэтчүүд Эрдэнэтчүүддээ хайртай” хөтөлбөр. Товчхондоо бол Нэг өрхийг-Нэг ажлын байраар хангая л гэж байгаа юм. Энэ хөтөлбөр амжилттай хэрэгжсэнээрээ иргэдээс авсан санал, батлан хэрэгжүүлж буй бодлогын маань 30-40 хувийг нь гүйцэлдүүлнэ гэж ойлгож байгаа. Цаашид бид үүнийг илүү өргөжүүлэх үүднээс олон улсын байгууллагуудаас хөрөнгө оруулалт татах, “Итгэлийн зээл”-ийг хөтөлбөрийн үйл ажиллагаатай уялдуулах судалгааг хийж байна. Мөн Баян-Өндөр сумын “Сум хөгжүүлэх сан”-ийн зээлийг ч ялгаагүй “Эрдэнэтчүүд Эрдэнэтчүүддээ хайртай” хөтөлбөрийн хүрээнд олгодог дэмжлэг болгох боломжийг судалж байна. 
 
Мэдээллийн төв

 

 

Сэтгэгдэл


Сэтгэгдэл

Мэдэгдэл. Энд сэтгэгдэл байхгүй!

Холбоотой мэдээлэл

2015-09-11 768
Цэцэрлэг, сургуулиудын үдийн цай хөтөлбөрт хүнсний бүтээгдэхүүн ханган нийлүүлэгчдийн дунд сургалт зохион байгуулагдлаа

Орхон аймгийн Мэргэжлийн хяналтын газрын Эрүүл ахуй халдвар хамгаалал, боловсрол, хүнсний чанар стандарт, ...

2015-10-21 4666
Аймгийн Жижиг дунд үйлдвэр болон өрхийн үйлдвэрлэлийг дэмжих сангийн хурлаар 8 төсөл дэмжигдлээ

2015 оны 10-р сарын 20-ны өдрийн Аймгийн ЖДҮ болон өрхийн үйлдвэрлэлийг дэмжих сангийн төслийн хурлаар ...

2015-10-29 1747
Манай аймагт Хангайн бүсийн "Нийгмийн даатгалын тогтолцооны эрх зүйн шинэчлэл" үндэсний хэлэлцүүлэг болж байна

Хангайн бүсийн "Нийгмийн даатгалын тогтолцооны эрх зүйн шинэчлэл" үндэсний хэлэлцүүлэг Орхон ...

Сурталчилгаа

Веб статистик

Таны IP хаяг: 54.221.136.62
2017-11-30-ний өдрөөс хойш.
  • 3 Онлайн
  • 185 Өнөөдөр
  • 1109 Өчигдөр
  • 19913 Долоо хоногт
  • 43482 Сүүлийн сард
  • 859427 Нийт хандалт

Санал асуулга

Манай вэб сайт таны санаанд хэр нийцэж байна?
Нийт саналын тоо:  602

Facebook

Цаг агаар

ХЭРЭГЛЭГЧИЙН СУДАЛГАА