Орхон аймгийн засаг даргын тамгын газрын 2015 оны 6 дугаар сарын товч мэдээ

1. Удирдлага, зохион байгуулалтын ажлын хүрээнд:

Засаг захиргаа, нутаг дэвсгэрийн үндсэн нэгж болох сумдын нутгийн өөрөө удирдах болон захиргааны байгууллагын мэргэшсэн албаны удирдах ажилтнуудын мэргэшил, мэдлэгийг дээшлүүлэх зорилгоор ХБНГУ-ын Конрад-Аденауэр сангийн санхүүжилтээр Засгийн газрын Хэрэг эрхлэх газар, аймгийн ИТХ, ЗДТГ хамтран сургалт зохион байгуулсан ба тус сургалтанд Булган, Дархан-Уул, Орхон, Сэлэнгэ  аймгийн аймаг, сумдын ИТХ-ын Тэргүүлэгчдийн нарийн бичгийн дарга, Засаг даргын Тамгын газрын дарга зэрэг 110 орчим албан тушаалтнууд оролцлоо.

“Эрдэнэт үйлдвэр" ХХК-ийн өргөтгөлийг ашиглалтанд хүлээн авах нээлтийн ажиллагаанд Монгол улсын Ерөнхийлөгч Ц.Элбэгдорж, ОХУ-аас Монгол улсад суугаа онц бөгөөд Бүрэн эрхт элчин сайд Азизов Искандер Кубарович тэргүүтэй 200-аад зочид төлөөлөгчид оролцлоо. “Эрдэнэт үйлдвэр" ХХК-ийн өргөтгөл ашиглалтанд орсноор тус үйлдвэр жилд 32.0 сая тонн хүдэр боловсруулж, төсвийн орлогыг 73.0 тэрбум төгрөгөөр нэмэгдүүлэх эдийн засгийн өндөр ач холбогдолтой бүтээн байгуулалт болж байна. "Эрдэнэт үйлдвэр" ХХК нь жилд 26 сая тонн хүдэр боловсруулж байсан бол зургаан сая тонноор нэмэгдэж буй ажээ. Жилд 500 гаруй мянган тонныг үйлдвэрлэдэг зэсийн баяжмалын хэмжээ ч  113 мянган тонноор нэмэгдэж байгааг үйлдвэрийн өргөтгөлийн нээлтийн үеэр онцлов.

 УИХ-ын гишүүн, Хүн амын хөгжил, нийгмийн хамгааллын яамны сайд С.Эрдэнэ манай аймагт ажиллаж, нийгмийн хамгааллын салбарын ажилтан албан хаагчид болон иргэдийн төлөөлөлтэй уулзалт зохион байгуулан  төрийн бодлогын үйл ажиллагаа, цаашид шийдвэрлэх асуудлын талаар санал солилцлоо.

2. Эдийн засаг, төсөв, санхүүгийн бодлогын хүрээнд:

Аймгийн төсөвт 38.3 тэрбум төгрөгийн орлогыг төвлөрүүлж, төсвийн гүйцэтгэл 120.6 хувьтай байна. Нийт орлогын 49.8 хувь нь татварын бус орлого бөгөөд өмнөх оноос 166.6 дахин нэмэгдсэн байна. Энэ нь тусгай шилжүүлгийн орлогыг нийт орлогын дүнд оруулдаг болсонтой холбоотой. 

Орон нутгийн төсвөөс төлөвлөгөөт санхүүжилтийн 84.0 хувийг буюу 29.2 тэрбум төгрөгийн зарлага санхүүжилт хийсний 4.9 хувийг нийгмийн даатгалын шимтгэлд, 16.0 хувийг татаас ба урсгал шилжүүлэгт, 17.0 хувийг хөрөнгийн зардалд, 17.9 хувийг бараа үйлчилгээний зардалд, 44.2 хувийг цалин хөлсөнд зарцуулжээ.

Тайлант хугацаанд орон нутгийн төсвийн байгууллагууд 349.7 сая төгрөгийн өр, 4.3 сая төгрөгийн авлагатай ажиллажээ. Төсвийн өглөгийн 1.0 хувийг гэрэл цахилгаан, 3.0 хувийг тээвэр шатахуун, 3.0 хувийг бусад зардал, 5.0 хувийг цэвэр бохир ус, 10.0 хувийг түлш халаалт, 31.0 хувийг нийгмийн даатгалын шимтгэл, 47.0 хувийг ажиллагсад олгох цалин эзэлж байна. Өмнөх оноос өглөг 51.8 хувиар, авлага 63.8 хувиар буурсан байна.

3. Хууль, эрх зүйн бодлогын хүрээнд:  

Цагдаагийн газрын мэдээгээр эхний 6 сарын байдлаар 308 хэрэгт 297 хүн холбогдон шалгагдаж, хэргийн илрүүлэлт 65.4 хувьтай байна. 

Нийт бүртгэгдсэн хэргийн 39.0 хувь нь согтуугаар үйлдэгдсэн хэрэг, 36.5 хувь нь бүртгэгдэх үедээ сэжигтнээр тооцвол зохих этгээд нь тогтоогдоогүй хэрэг, 6.5 хувь нь хүнд, онц хүнд хэрэг байгаа ба өнгөрсөн оны мөн үеэс согтуугаар үйлдэгдсэн гэмт хэргийн тоо 12.1 хувиар нэмэгдэж, хүнд, онц хүнд хэрэг 28.6 хувиар, харин бүртгэгдэх үедээ сэжигтнээр тооцвол зохих этгээд нь тогтоогдоогүй хэрэг 22.1 хувиар буурсан байна. Гэмт хэргийн улмаас иргэд, байгууллага, аж ахуйн нэгжид 410.1 сая төгрөгийн хохирол учирч, 169 хүн хүнд ба хөнгөнөөр гэмтсэн ба нийт хохирлын 49.6 хувийг нь нөхөн төлүүлсэн байна.

Согтуугаар тээврийн хэрэгсэл жолоодон замын хөдөлгөөнд оролцож байсан 1168 жолоочийг илрүүлэн, 826 жолоочийн эрхийг тодорхой хугацаагаар хасч шийтгэжээ. Өнгөрсөн оны мөн үеэс согтуугаар тээврийн хэрэгсэл жолоодон замын хөдөлгөөнд оролцсон жолоочийн тоо 15.5 хувиар, эрх хасалт 15.8 хувиар нэмэгджээ.

4. Боловсрол, эрүүл мэнд, урлаг, спорт, нийгмийн хамгааллын бодлогын хүрээнд:

Монгол улсын Ерөнхийлөгчийн 2013 оны 105 дугаар зарлигийн дагуу аймгийн хэмжээнд Үндэсний бичиг үсгийн баярын хаалтын ажиллагааг Номын төвтэй хамтран зохион байгуулж, сарын аянд идэвхитэй оролцсон байгууллага, иргэдийг шагнаж урамшуулсан ба сайхан бичиг, наамал бичгийн үзэсгэлэн гаргалаа.

Ерөнхий боловсролын сургуулийн сурагчдын анги дэвших шалгалт болон их, дээд сургуулийн 2015 оны элсэлтийн шалгалт, Багшийн мэргэжил дээшлүүлэх инстисуттай хамтран цэцэрлэгийн 219 багшид сургалт зохион байгууллаа.

  Баян-Өндөр сумын Орон нутгийн хөгжлийн сангийн 8,2 сая төгрөгийн хөрөнгө оруулалтаар 7-р сургууль дээр хөгжлийн бэрхшээлтэй хүүхдүүдийн анги танхим байгуулж, шаардлагатай тоног төхөөрөмжөөр хангав. 

Эрүүл мэндийн газар, Цусны салбар банк, “Эрдэнэт үйлдвэр” ХХК-ийн Баяжуулах фабрик, Улаан загалмайн хороотой хамтран “Цусаа бэлэглэж бусдыг аваръя” аян зохион байгуулж 21 донор шинээр элсүүллээ. 

Баян-Өндөр сумын “Сая үр” ХХК-ийн “Бар үр” 2 дугаар зэрэглэлийн эмийн сан,  “Шижир цацралт” ХХК-ийн “Шинэ эрин” нүдний өвчний оношлогоо эмчилгээ, тусламж үзүүлэх үүдэн эмнэлэг, “Цэдр”ХХК-ийн “Хатагтай” нөхөн үржихүйн эрүүл мэндийн оношлогоо эмчилгээний тусламж үзүүлэх үүдэн эмнэлэг, “Монхимо” ХХК-ийн “Орхон Монхимо”  ясны сийрэгжилт оношилгооны үүдэн эмнэлэг, хүүхдийн өвчний оношлогоо эмчилгээний “Оюу чагнуур” зэрэг үүдэн эмнэлгүүдэд эрүүл мэндийн үйлчилгээ үзүүлэх тусгай зөвшөөрөл олгов.

Аймгийн хэмжээнд 6 сарын 16-ны өдрөөс эхлэн түүх, соёл, дурсгалын үл хөдлөх хөрөнгийн тооллогын ажил явагдаж  байна. 

Хүүхдийн хөдөлмөрийн эсрэг дэлхийн өдөрт зориулан хөдөлмөр эрхлэгч хүүхдүүдэд “Хүүхдэд аюултай ажил” сургалт, шатар даам, гүйлт, дууны тэмцээн зохион байгуулж, давхардсан тоогоор 76 хүүхэд, Зорилтот бүлгийн иргэдэд эерэг хандлага бий болгох, харилцах ур чадварт суралцах сургалт зохион байгуулж, 32 иргэн хамрагдлаа.

Хүүхэд, гэр бүлийн хэлтэстэй хамтран хурдан морь уяaч иргэд, уралдаанч хүүхдүүдэд "Уралдаанч хүүхдийн аюулгүй байдалд уяaчид, эцэг эх, асран хамгаалагчдын үүрэг хариуцлага" сэдэвт сургалт ярилцлага зохион байгууллаа.

“Хөгжлийн бэрхшээлтэй иргэний ажлын байрыг дэмжих хөтөлбөр” -ийн хүрээнд 47 иргэнийг “Хөдөлмөр эрхлэлтийн чадамжид суурилсан мэргэжил олгох сургалт”-нд хамруулж, хөгжлийн бэрхшээлтэй иргэдийн дунд волейболын улсын аварга шалгаруулах тэмцээнийг зохион байгуулж, 8 аймгийн тамирчид оролцлоо. “Монгол TRY-2015” хөгжлийн бэрхшээлтэй иргэдийн нөлөөллийн аялал манай аймагт зохион байгуулагдаж нийт 40 гаруй иргэд хамрагдлаа. 

Хөдөлмөрийн хэлтсийн нээлттэй өдөрлөгийн үеэр 205 иргэнд зөвлөгөө мэдээлэл өгч, 19 ажил олгогчоос 32 ажлын байранд 118 иргэн ажилд авах захиалга ирснээс 95 иргэнийг ажил олгогчид зучлах ажлыг зохион байгуулав. Аймгийн хэмжээнд 853 өрхийн 4668 иргэнийг хүнс тэжээлийн дэмжлэг туслалцаа үзүүлэх үйлчилгээнд хамруулж  46,9 сая төгрөгийн хүнсний эрхийн бичиг олголоо. “Нийгмийн халамж, үйлчилгээний мэдээллийн систем /WAIS/”-ийн сургалтыг Нийгмийн халамж үйлчилгээний хэлтсийн ажилтнуудын дунд зохион байгуулав.

5. Хүнс, хөдөө аж ахуй, байгаль орчны бодлогын хүрээнд:

Аймгийн хэмжээнд нийт 4128.4 га-д тариалалт хийхээс 4120,3-д га тариалалт хийж тариалалт 99,8 хувьтай байна. Үүнээс улаан буудай 3200 га-д тарихаас 3996 га буюу 124.9 хувь, төмс 343.4 га-д тарихаас 238.5 га буюу 69.5 хувь, хүнсний ногоо 385 га-д тарихаас 211.1 га буюу 74 хувь,тэжээлийн ургамал 200 га-д тарихаас 122 га буюу 60.8 хувь,тосны ургамал 45 га-д тус тус тариалалт хийгдээд байна

Нөөцийн махны борлуултын мэдээгээр 2015.06.12-18-ныг дуустал хугацаанд үхрийн мах 34 тн, хонины мах 31.8 тн, ямааны мах 15.6 тн буюу 81.5 тн мах борлуулсан байна. 2015.06.18-ны өдрийн байдлаар үхрийн мах 204.3 тн,хонины мах 174.5 тн, ямааны мах 63.3 тн буюу 442.2 тн махыг худалдан борлуулж , үхрийн мах 361.8 тн, хонины мах 131.5 тн, ямааны мах 141.5 тн буюу 634.8 тн махны үлдэгдэлтэй байна.

“Газрын хөрс бол үнэгүй зүйл биш. Эрүүл хөрсөнд хөрөнгө оруулцгаая” уриан дор цөлжилттэй тэмцэх олон улсын өдрөөр багуудын Засаг дарга нарт мэдээлэл өгч, цөлжилттэй тэмцэх, цөлжилтөөс урьдчилан сэргийлэх талаар орон нутгийн хэвлэл мэдээллийн хэрэгслэлээр, иргэд олон нийтэд сурталчиллаа. Аймгийн байгаль орчны төлөв байдал, байгалийн нөөцийн өөрчлөлтийн 2013-2014 оны тайланг боловсруулж, холбогдох мэргэжлийн байгууллагын албан хаагчид болон олон нийтийн хэрэгцээнд зориулан товхимол хэвлүүллээ.

6 сарын 22-ны өдрөөс 7 сарын 22-ны өдрийг хүртэл “Зам талбайн цэвэрлэгээ үйлчилгээ”, “Хог хаягдлын цуглуулалт, тээвэрлэлт, хур хогийг цэвэрлэх” гэсэн 2 чиглэлээр “Цэвэр орчин” сэдэвт сарын аяныг зарлаад байна.

6. Үйлдвэрлэл үйлчилгээ, дэд бүтцийн салбарын бодлогын хүрээнд:

Эхний 6 сарын байдлаар аж үйлдвэрийн салбарт 638.4 тэрбум төгрөгийн бүтээгдэхүүн үйлдвэрлэн, 660.5 тэрбум төгрөгийн бүтээгдэхүүн борлуулсан нь өнгөрсөн оны мөн үеэс үйлдвэрлэлт 1.3 хувиар буурч, борлуулалт 0.7 хувиар нэмэгдсэн байна.

Аймгийн Худалдаа аж үйлдвэрийн танхимтай хамтран ОХУ-ын Улаан-Үд хотод Эрдэнэт хотын үйлдвэрлэл эрхлэгчдийн үзэсгэлэн гаргаж, бизнес эрхлэгчдийн дунд уулзалт зохион байгуулж зарим томоохон худалдааны сүлжээ компаниудтай хамтарч ажиллах гэрээ хэлцэл хийх талаар санал солилцож, тус хотын Нийгмийн тээврийн үйлчилгээ, цэцэрлэгжүүлэлт, ногоон байгууламж хариуцсан аж ахуйн нэгжүүдтэй харилцан туршлага судаллаа.

Байгаль орчин, ногоон хөгжил, аялал жуулчлалын яам, Уул уурхайн яам, Аж үйлдвэрийн яам, Шинжлэх ухааны академи, ШУТИС, Дархан-Уул аймгийн Ургамал, газар тариалангийн хүрээлэнгийн 30 гаруй төлөөлөгч Орхон аймгийн ЗДТГ, Байгаль орчны газар, Эрдэнэт үйлдвэр ХХК-тай хамтран зохион байгуулж буй “Баян-Өндөр уулан дахь байгалийн нөхөн сэргээлт” онол практикийн бага хуралд оролцож, Эрдэнэт үйлдвэрийн Хүдрийн ил уурхай, Баяжуулах фабрикийн Өөрөө нунтаглах хэсгийн өргөтгөл болон Баян-Өндөр уулан дахь биологийн төрөл зүйл, хөрс, ус, ургамал, амьтны аймгийн өнөөгийн байдалтай танилцаж, нөхөн сэргээх ажилд зөвлөмж өгөх эрдэмтдийн багийг байгууллаа. 

Мөн аймгийн ЗДТГ, Эрдэнэт үйлдвэр ХХК, Герман улсын “Geotec Rohstoffe” байгууллагатай хамтран “Эрдэнэтийн уул уурхайн бүс нутгийн тогтвортой хөгжил” хэлэлцүүлгийг зохион байгуулсан. Тус хэлэлцүүлгээс Орхон аймагт уул уурхайн бүс нутгийн тогтвортой хөгжлийг хангах, байгаль орчин, нөхөн сэргээлтийн чиглэлээр 6 төсөл хэрэгжүүлэхээр болсон байна.  

 

 

АЙМГИЙН ЗАСАГ ДАРГЫН ТАМГЫН ГАЗАР

 

 

Холбоотой мэдээлэл

Ангилал

Цахим төрийн үйлчилгээ


Сурталчилгаа

 

 

 

Веб статистик

Таны IP хаяг: 54.92.164.9
2021-01-03-ний өдрөөс хойш.
  • 6 Онлайн
  • 175 Өнөөдөр
  • 823 Өчигдөр
  • 2851 Долоо хоногт
  • 33071 Сүүлийн сард
  • 6528457 Нийт хандалт

Санал асуулга

Манай вэб сайт таны санаанд хэр нийцэж байна?
Нийт саналын тоо:  1086

Facebook

Цаг агаар