Нийгмийн хөгжлийн хэлтсийн мэдээлэл

     Хөдөлмөрийн хэлтсээс зохион байгуулж байгаа “Сумын залуус” төсөл хөтөлбөрийн хүрээнд аймгийн ЗДТГ, Залуучуудын холбоо, БОЭТ-ийн цусны банкны явуулын станцтай хамтран “Цусаа бэлэглэе” аян өрнүүллээ. Тус аянаар нийт 25 хүнээс 8 литр 750 гр цус цуглуулжээ.

   Монголын Хөгжлийн Бэрхшээлтэй Иргэдийн Чөлөөт Үйлдвэрчний Эвлэлийн Холбоо, Монголын Хөгжлийн Бэрхшээлтэй Иргэдийн Холбооноос хамтран хоёр дахь удаагаа зохион байгуулж буй “Эх орны үзэсгэлэнт нуур, далайн ай сав нутаг” хэмээх тойрон аяллыг 08-р сарын 01-нээс 20 хүртэл хангайн бүсэд зохион байгуулж байгаа бөгөөд манай аймагт 08-р сарын 15-ны өдөр 15 хүний бүрэлдэхүүнтэй баг ирж орон нутгийн музей үзэж сонирхлоо.
   ЭМГ дээр Солонгос улсын “Бундан Жэсан” эмнэлэгийн 10 эмч мэргэжилтэн нүд, шүд, дотрын үзлэг үнэ төлбөргүй хийж, эм тариа түгээв.
   Нийгмийн халамжийн тухай хуулийн дагуу 7967 иргэнийг халамжийн тэтгэвэр, тэтгэмж, тусламж, хөнгөлөлтөд хамруулан 8-р сарын 513,6 сая төгрөгийг файл банк руу илгээлээ.
   Баян-Өндөр, Жаргалант сумын нийт 16 багийн 499 өрхийн 2838 иргэнд 21,5 сая төгрөгийн хүнсний бүтээгдэхүүн  дэлгүүрээр олгов.
   08-р сарын 22-23-нд зохион байгуулагдах Мэдрэлийн эмч нарын олон улсын форум угтаж БОЭТ, эмнэлэг-сувилал, хувийн хэвшлийн эмнэлэг болон өрхийн эрүүл мэндийн төвийн эмч нарт мэдээлэл хүргэлээ.
    “Үйлс Бадрах”, “Элбэрэлт үйлс” өрхийн эрүүл мэндийн төвүүдийг нэгтгэж  даргаар нь Л. Чанцалдуламыг  томилон эмнэлгийн анхан шатны тусламж үйлчилгээг иргэдэд түргэн шуурхай, чанартай  хүргэхийг үүрэг болгов.
    Улаанбаатар хотод фенобарбитал шахмал эмийг тун хэтрүүлэн олгосны улмаас олон нярайн амь нас, эрүүл мэндэд ноцтой эрсдэл учруулснаас санамж аван ЭМСалбар, эмийн сангуудад “Эмийн жорын маягт, жор бичилт MNS5376:2011 стандарт”-ын хэрэгжилтийг  нягт мөрдөж ажиллах талаар анхааруулга хүргүүллээ.
    2014 оны 08-р сарын 09,10-нд “Багшаар ажиллах эрх олгох” шалгалтыг БШУЯ, Багшийн мэргэжил дээшлүүлэх институттэй хамтран Технологийн сургууль дээр зохион байгууллаа. Шалгалтанд134 багш оролцсоноос 10 нь тэнцжээ.
   Солонгос улсын Их сургуулиудын Нэгдсэн Холбоо, КОЙКО олон улсын байгууллага хамтран “WEK залуусын дунд хугацааны сайн дурын баг  томилох” ажлын шугмаар манай аймагт 6 оюутан таван чиглэлээр ажиллахаар ирсэн байна.
    “Эх орон шингэсэн эрдмийн дүрэмт хувцас”-ыг “Подиум”, “Дүдө” ХХК  ханган нийлүүлэхээр ажиллаж байна. “Эрд сүлж” компанийн туслан гүйцэтгэгч “Подиум” ХХК 6700, “Дүдө” ХХК 8000 ширхэг бага, дунд, ахлах ангийн дүрэмт хувцас зүүнээс гаргажээ. “Подиум” ХХК нь 1-р хорооллын 16-р байрны ард байрлах “Подиум” борлуулалтын цэгт ням гаригаас бусад өдөр 08.30-19.00 цаг хүртэл, “Дүдө” ХХК нь 1-р хорооллын “Их мандал” төвийн 2-р давхарт байрлах “Хайтан” цэцгийн дэлгүүрт 09.00 -19. 00 цаг хүртэл тус,тус дүрэмт хувцсаа борлуулж байна.