Шинээр байгуулах хатуу хучилттай авто замын зураг төсвийн ажил дуусчээ

Энэ онд манай аймгийн хэмжээнд шинээр 2,1 км хатуу хучилттай зам байгуулна. Үүнд Хабитат хорооллыг Эрдэнэ багтай холбох 1,8 км хатуу хучилттай зам тавих зардалд 1.3 тэрбум төгрөг төсөвлөсөн бол Баянбулаг багт 1.3 км хатуу хучилттай авто зам тавихад 555,8 сая төгрөг хувиарлаад байна. Өнөөдрийн байдлаар эдгээр ажлын зураг төсөв боловсруулах ажил дуусаад байна. Тодруулбал, Хабитат хорооллыг Эрдэнэ багтай холбох замын зургийг “ХЗТ” ХХК, Баянбулаг багийн 1.3 км замын зураг төсвийг “Бат глостер” ХХК гүйцэтгэжээ. Энэ онд шинээр байгуулах хатуу хучилттай зам нь орчин үеийн стандартад нийцсэн буюу 400-600 метр тутамд нийтийн тээврийн “карма” зогсоол байгуулна. Мөн гүйцэтгэгч компаниас 3 жилийн баталгаат хугацаа шаардах бөгөөд ашиглалтын хугацаа нь 13 жил байх гэнэ.
Түүнээс гадна орон сууцны барилга дундах зам засварын ажлыг хэд хэдэн газарт хийхээр болсон бөгөөд үүнд зарцуулах хөрөнгө нь батлагдаад байна. 5,6-р бичил хорооллын доторх замын өргөтгөл, шинэчлэлтэд 2,0 тэрбум, 1,4-р бичил хорооллын доторх замын өргөтгөл, шинэчлэлтэд 1,4 тэрбум төгрөг тус тус төсөвлөсөн. Мөн Хантай, Залуучуудын гудамж, БОЭТ-ийн баруун талын 1,2 км урт автозамын өргөтгөл шинэчлэлд 971, Тюряковын гудамжны авто замын хэсэгчилсэн шинэчлэлд 332,9 сая төгрөг тус тус төсөвлөөд байна.

                                                             Эх сурвалж:http:erdenetinfo.mn