Аймгийн Засаг дарга ТББ-уудтай гэрээ байгууллаа.

2014-01-16
6213
0 сэтгэгдэл
Хэвлэх

   Манай аймаг 2008 оноос эхлэн төрийн зарим чиг үүргийг Төрийн бус байгууллагуудаар гүйцэтгүүлэх, санхүүгийн хувьд дэмжих зорилгоор аймгийн төсөвтөө тодорхой хэмжээний хөрөнгө тусгаж, Төрийн бус байгууллагуудаас ажил гүйцэтгэх санал авч нэгтгэн, хэрэгжүүлэх боломжтой санал ирүүлсэн Төрийн бус байгууллагуудтай аймгийн Засаг дарга хамтын ажиллагааны гэрээ байгуулан 7 дахь жилдээ ажиллаж байна.
Өнөөдрийн байдлаар Орхон аймагт үйл ажиллагаа явуулж байгаа 105 Төрийн бус байгууллагын судалгаа байдаг бөгөөд эдгээрээс 42 Төрийн бус байгууллага байнгын идэвхтэй үйл ажиллагаа явуулж байна.
Төрийн бус байгууллагуудаас ирүүлсэн ажил гүйцэтгэх саналуудыг дэмжин, төрийн зарим чиг үүргийг гүйцэтгүүлэхээр:
-    2008 онд 15 ТББ-д 29.9 сая
-    2009 онд 8 ТББ-д 40.6 сая
-    2010 онд 17 ТББ-д 28.8 сая
-    2011 онд 21 ТББ-д 30.0 сая
-    2012 онд 35 ТББ-д 57,8 сая
-    2013 онд 38 ТББ-тай 75.0 сая буюу нийт давхардсан тоогоор 134 ТББ-тай
262,1 сая төгрөгийн санхүүжилтийг гэрээ байгуулан орон нутгийн төсвөөс олгосон бөгөөд энэхүү хөрөнгө нь эрүүл мэнд, боловсрол, соёл, ахмадуудын халамж, нийтийн тээвэр, хүүхэд залуучуудад зориулсан үйл ажиллагаа, хөгжлийн бэрхшээлтэй иргэдийг нийгэмшүүлэх тэдэнд дэмжлэг үзүүлэх, шударга өрсөлдөөнийг дэмжих, бизнес эрхлэгчдэд дэмжлэг үзүүлэх, үзэсгэлэн яармаг, тэмцээн уралдаан, олимпиад зохион байгуулах, хүнсний хангамжийн аюулгүй байдал, хууль тогтоомжийн сургалт сурталчилгаа, ногоон байгууламж нэмэгдүүлэх, хамгаалах зэрэг үйл ажиллагаанд зарцуулагдаад байна.
Энэ 2014 онд аймгийн ЗДТГ-т 91 ТББ-даас хамтран ажиллах санал ирүүлсэнийг зөвлөлийн хурлаар хэлэцээд 60 ТББ-даар 90,0 сая төгрөгийн шаардлагатай гэж үзсэн ажил, үйлчилгээ гүйцэтгүүлэхээр аймгийн Засаг дарга гэрээ байгууллаа.
Цаашид төр, иргэний нийгмийн байгууллагын хамтын ажиллагаа улам өргөжин аймгийнхаа иргэдэд төрийн үйлчилгээг хүртээмжтэй хүргэхийн төлөө аймгийн ЗДТГ ажиллах болно.