Нүүр хуудас Веб сайт Өргөдөл гомдол
Орхон аймаг
Төрийн үйлчилгээний лавлагааны систем
Нүүр » Улсын бүртгэлийн хэлтэс
Асуулт: Би 1972 онд Завхан аймагт төрсөн миний төрөлтийн лавлагаа Орхон аймгаас гарах уу?
Хариулт: Гарахгүй. Учир нь анх регистрийн дугаар олгосноос /1988 он/ өмнөх төрөлт иргэний бүртгэлийн санд цахим хэлбэрээр ороогүй бөгөөд та Улсын бүртгэлийн ерөнхий газрын иргэний баримтын төв архив болон Завхан аймгийн Улсын бүртгэлийн хэлтсээс төрөлтийн лавлагаагаа авах боломжтой.

Асуулт: Гадаад паспортыг орон нутагт сунгадаг уу, дээд тал нь хэдэн жилээр сунгадаг вэ?
Хариулт: Орон нутагт аймгийн Улсын бүртгэлийн хэлтэс дээр гадаад паспорт сунгана. Дээд тал нь 5 жилийн хугацаатай 2 удаа сунгалт хийгдэнэ.
Асуулт: Намайг цэргийн алба хааж байх үед эхнэр маань төрөөд тэр үед бид гэрлэлтээ батлуулагүй байсны улмаас өөрөөрөө овоглосон. Одоо бид гэрлэсэн хүүхдийн нэрийг эцэг миний нэрээр овоглож болох уу?
Хариулт: Болно. Хүүхдийн төрсний гэрчилгээ, эцэг эхийн гэрлэлтийн гэрчилгээ, эцэг эхийн хамтран гаргасан өргөдлийг үндэслэн эцэг тогтоосны бүртгэл хийн төрсний гэрчилгээг сольж олгоно.
Асуулт: Эхнэр бид хоёр гэрлэлтээ цуцлуулах хүсэлтэй хаана хандах вэ?
Хариулт: Та хоёр 18 хүртэлх насны хүүхэдгүй, эд хөрөнгийн маргаангүй, харилцан гэрлэлт цуцлахаа зөвшөөрсөн бол харьяалах сум дүүргийнхээ улсын бүртгэгчид хандана. Харин 18 хүртэлх насны хүүхэдтэй, эд хөрөнгийн маргаантай, хэн нэг нь гэрлэлт цуцлахаа зөвшөөрөхгүй бол харъяалах сум дүүргийн шүүхэд хандаж гэрлэлтээ цуцлуулна.
Асуулт: Шинээр төрсөн хүүхдээ хэд хоногийн дотор бүртгүүлэх вэ?
Хариулт: Хүүхдийг төрснөөс хойш төв суурин газарт 15 хоног, алслагдсан сум багт 30 хоногийн дотор бүртгүүлж төрсний гэрчилгээ авах ёстой.
Асуулт: Нөхөр бид хоёр гэрлэлтээ бүртгүүлж амжаагүй хүүхэдтэй боллоо. Хүүхдээ эцгээр нь овоглуулах хүсэлтэй байна боломжтой юу?
Хариулт: Боломжтой. Хүүхдийн эцэг, эх хоёр харьяалах сум, дүүргийнхээ улсын бүртгэгчид хандан хамтран өргөдлөө гарган :эцэг тогтоосон тухай бүртгэл” хийлгэнэ.
Асуулт: Би урьд нь нэрээ солиулж байсан одоо дахин солиулж болох уу?
Хариулт: Иргэний бүртгэлийн тухай хуулийн 18.7-д “Иргэний овог, эцгийн нэр, нэрийг 1-ээс илүүгүй удаа өөрчдөхийг зөвшөөрнө. Иргэн урьдийн овог, эцгийн нэр, нэрээ аваад өргөдөл гаргаж болно” хэмээн заасан.
Асуулт: Хууль зүйн яаманд бүртгэгдсэн ТББ-ууд шинээр бүртгэлд ороход хувийн хэрэг захиалаад 1 сар орчим хүлээх юм, үүнийг арай хурдан болгох арга байхгүй юу.
Хариулт: Хууль зүйн яаманд бүртгэгдсэн Төрийн бус байгууллагуудын хувийн хэргийг нэгтгэн үдэж архивласан байдаг бөгөөд тухайн хуулийн этгээд шинэчлэсэн бүртгэлд бүртгүүлэх гэж ирсэн тохиолдолд хэлтсээс УБЕГ-ын ХЭБГ-т хандан хувийн хэргийг нэхэмжилсний дагуу хувийн хэргийг шуудангаар ирүүлдэг.
Энэ тохиолдолд хуулийн этгээдийн хувийн хэрэг 20-30 хоногт манай хэлтэст ирдэг. Аймгуудын улсын бүртгэгчдээс Хуулийн зүйн яаманд бүртгэгдсэн хувийн хэргүүдийг шууд татаж авах хүсэлт явуулсан бөгөөд өнөөдрийн байдлаар дээрх асуудал шийдэгдээгүй байна.
Асуулт: Нэрийн лавлагаа хийлгэхэд цаг хугацаа шаардагддаг, 1-2 хоног хүлээх юм, та нар Орхон аймагтаа нэрээ баталгаажуулж болохгүй юу.
Хариулт: Хуулийн этгээдийн нэрийн баталгаажилт хийхэд орон нутгаас тухайн иргэний сонгосон нэрийг ONLINE сүлжээгээр илгээж УБЕГ-ын хуулийн этгээдийн нэрийн баталгаажилт хариуцсан мэргэжилтэн шалгаж баталгаажуулдаг.
Монгол улсын хэмжээнд үүсгэн байгуулагдаж байгаа болон нэрийн өөрчлөлт хийгдэх хуулийн этгээдэд нэрийг баталгаажуулах ажлыг УБЕГ-т хуулийн этгээдийн нэрийн баталгаажилт хариуцсан 2 бүртгэгч ажилладаг бөгөөд ажлын ачаалал, сүлжээний үйл ажиллагаанаас хамаарч орон нутгаас нэрийн баталгаажилт хийхэд 1-3 хоног шаардлагатай байдаг.
Асуулт: Эд хөрөнгийн бүртгэл хийлгэхэд олон хоногоор чирэгдүүлж байна. Цөөхөн хүн үйл үйлчилж байна. Орон тоог нэмэх талаар арга хэмжээ авна уу.
Хариулт: Иргэдийг чирэгдүүлж байгаа шалтгааныг арилгах талаар байгууллагын зүгээс авч хэрэгжүүлж байгаа арга хэмжээний талаар эхний асуултын хариултад дурьдсан.
Харин хувь хүн – бүртгэгчийн ёс зүй, харилцааны соёлоос хамааралтай чирэгдэл гарч байгаа гэж үзвэл байгууллагын даргад нь, аймгийн ЗДТГ-ын Хууль зүйн хэлтэс, Erdenet .mn сайт, 70353511 утас, Улсын бүртгэлийн Ерөнхий газрын 1890 утсанд гомдол, хүсэлт гаргаж болно.
Орон тооны хувьд 2013 оны турш эд хөрөнгийн бүртгэл дээр 2-3 бүртгэгч ажилласан. 2014 он гараад 1 бүртгэгчид Баян –Өндөр сумын 5-6 баг оногдохоор зохион байгуулж, 4 бүртгэгч үйлчилгээний танхимд ажиллаж байна.
Үүнээс гадна Улсын ахлах бүртгэгч хяналтын эрхтэйгээр лавлагаа олголт, тайлан мэдээ гаргалт, хяналт шалгалтыг хэрэгжүүлэн ажиллаж байна.
Эд хөрөнгийн эрхийн бүртгэлийн архивт 2 архивч ажиллаж байна.

1 2 >> Нийт тоо: 11